Trajneri i Kombëtares së futbollit të Sallës shpall listën për përballjen me Kroacinë dhe Ukrainën. Në kuadër të përgatitjeve për dy ndeshjet e ardhshme të Eliminatoreve të Kampionatit Evropian të Futbollit të Sallës, Kombëtarja shqiptare do të nisë të dielën grumbullimin. Kuqezinjtë do të luajnë ndaj Kroacisë më 7 prill 2021, në Sallën Sportive të Lojërave me Dorë “Feti Borova” të Parkut Olimpik të Tiranës, ndërsa 4 ditë më pas më 11 prill do të përballet në fushë të huaj me Ukrainën.
Trajneri i përfaqësueses shqiptare, Erind Resuli ka ftuar 14 lojtarë për këto dy sfida, por bie në sy fakti se këtë herë kuqezinjtë kanë shumë mungesa të kushtëzuara nga “Covid-19”-ta, dëmtimet fizike apo edhe pamundësi për t’u bashkuar me skuadrën për shkak të kufizimeve të vendosura kudo nëpër Evropë. Kështu, stafi teknik nuk do të ketë shërbimet e lojtarëve Besnik Rexhepajt, Rej Karaja, Almir Hasaj, Julio Cesar De Melo, Klodian Rrapi, Agon Ramadani dhe Enrico Bicaj.
Ndërkohë, kapiteni Roald Halimaj mund të mungojë në ndeshjen e dytë ndaj Ukrainës. Shqipëria ndodhet në Grupin 1 të Eliminatoreve të Evropianit së bashku me Kroacinë, Ukrainën dhe Danimarkën. Deri tani kuqezinjtë kanë 3 pikë, po aq sa edhe Danimarka, dhe Ukraina, ndërkohë që grupin e kryeson Kroacia me 12 pikë pas 4 ndeshjesh. Edhe pse Kombëtarja do të ketë shumë mungesa, kuqezinjtë do të përpiqen të bëjnë maksimumin ndaj sy prej skuadrave më të forta në Evropë për momentin, e cila ka fituar në Tiranë me shifrat 10-3 në ndeshjen e parë.
