Fushata elektorale ka marrë një tjetër vrull pas nisjes së saj më 25 mars. Kryeministri Edi Rama po mbahet me dy proceset e nisura në këto dy vitet e fundit siç është procesi i vaksinimit dhe rindërtimi pas tërmetit të 26 nëntorit 2019.
Për Ramën këto do të jenë sfidat krysore të mandatit të tretë, por jo vetëm. Këto dy “gurë” Rama i mban fort për të “goditur” edhe kundërshtarin e tij politik, Lulzim Basha. Ndryshe nga një rotacion tetë vjeçar që ka ndodhur në të kaluarën tonë politike, pas rrëzimit të komunizmit, Rama pretendon se nuk është konsumuar dhe ende ka energji për të çuar vendin përpara, duke kërkuar edhe një mandat tjetër. Dhe siç e do edhe “puna” Rama ka shprehur besimin se edhe këtë mandat të tretë do e marrë. Përveç këtyre premtimeve, Rama në fjalimet e tij i vihet re edhe anatemimi i figurave të Partisë Demokratike dhe Lëvizjes Socialiste për Intergrim. Nga ana tjetër kreu i demokratëve Lulzim Basha po bën një fushatë të qetë sa i takon shinjestrimit të Ramës. Merret me dështimet e qeverisë sipas tij, por jo me individin Ramë. Kërkon gjithashtu të injektojë entuziazëm tek eletorati, duke i kthyer një pjesë të takimeve gati në tubime.
Duket se strategjia e Bashës është “premto dhe tento”! Ka zhvilluar takime me kategori të ndryshme, nga fermeri tek profesorët, nga sipërmarrësit tek punëtorët. Premtime kudo për rritje pagash, mbështetje finaciare për studentët, bujqësinë, rritje pensionesh apo ulje taksash. Gjithashtu Basha po tenton të “veshë” veten që tani me kostumin e kryeministrit, duke përmendur shpesh fjalët: qeveria ime në vijim, unë… etj. Edhe Basha e ka të qartë se kjo mbetet ende një ëndërr, por Basha po “merret me veten”, (të lënë pasdore për shumë vite).