Nga Fernada Cenko
Pas fillimit të vaksinimit masiv, që nisi më 29 mars, sot bëhen 260 mijë qytetarë që kanë marrë vaksinën kundër Covid 19. Në ditën e pesëmbëdhtjetë, ISHP pranon që deri në fundjavë të vaksinohen 300 mijë qytetarë. Pas vaksinimit të ekipit mjekësor, mësuesve, të moshuarve dhe gazetarëve, mosha ka zbritur deri në 60 vjeç për ata që kanë sëmundje shoqëruese. Deri tani në vendin tonë janë përdorur vaksinat Pfizer, AstraZeneca, Sinovac, Sputnic V. Masivisht qytetarët janë vaksinuar me Sinovac dhe AstraZeneca. Ndërsa pritet që ministria të bëjë gati planin për të vaksinuar me Pfizer personat që bëjnë dializë dhe që kanë kryer transplant. Ndërsa priste dërgesën e radhës së vaksinave kineze, ministri e Rindërtimit Arben Ahmetaj tha se “brenda kësaj jave do të vijnë në Shqipëri edhe 50 mijë dozat e tjera të Sputnik V”.
Reagimet për Sinovac
Pas pohimit të ekspertëve kinezë për efektshmërinë e ulët të vaksinës Sinovac, autoritetet shqiptare deklarojnë qëndrimin e tyre ndaj kësaj vaksine. Përgjegjësja e vaksinimit në Institutin e Shëndetit Publik Erida Nelajn thotë se do të vijojë fushata për imunizimin e popullatës. Për eksperten çdo vaksinë, përfshi edhe kinezen Sinovac, synon të ulë format e rënda dhe vdekjet nga koronavirusi. “Nuk bëhet fjalë për pezullim. Ne kemi të dhëna qe vijnë nga Turqia, ku të gjitha vaksinat kanë si objektiv shtrime në spitale. Duhet të vaksinohemi sa më shumë që të ulim transmetimin e infeksionit”, tha ajo. Pavarësisht skepticizmit edhe ndaj Astra Zeneca, e dyshimet për efekte anësore, Shqipëria nuk do ta pezullojë as këtë vaksinë, duke vijuar aplikimin te kategoritë e përcaktuara. Specialistët e Shëndetit Publik thonë se efektet e deritanishme nga vaksinat kanë qenë ato të pritshmet, temperaturë dhe dhimbje trupi. Ndërsa nga neglizhimi i masave, nuk kanë munguar rastet e infektimit të personat që kanë marrë dozën e parë të vaksinës anti-covid. “Ka pasur infektime në personat që kanë marrë dozën e parë. Do gati një muaj që të fillojnë të krijohen antitrupat, prandaj nuk duhet të ulim vigjilencën”, shton Nelaj. Shqipëria do të vijojë vaksinimin me dy doza për çdo tip vaksine, sipas protokollit të përcaktuar nga çdo prodhues. Ndërsa në botë kanë nisur diskutimet për mundësinë e aplikimit të dozës së tretë si dhe vaksinime kombinuar me dy tip vaksinash anti-covid.
