Në cilin kuvend do shkosh, në atë të datës 11 apo 18 dhjetor? Nuk ka anëtar të partisë Demokratike që nuk e bën këtë pyetje këto ditë. Kjo parti është ndarë me dysh tashmë, në mbështetës të Sali Berishës që do jenë prezentë në kuvendin e të shtunë së 11 dhjetorit dhe në mbështetës të Lulzim Bashës që do jenë prezent në kuvendin e të shtunës së 18 dhjetorit. Disa do shkojnë në kuvendin e parë dhe disa do shkojnë në të dytin dhe anasjelltas. Ka edhe nga ata që do shkojnë te të dy kuvendet.
Por prisni! Ka edhe një grup tjetër që nuk do bëjnë asnjë nga këto. Skerdilajd Sulozeqi është delegat i Kuvendit Kombëtar i certifikuar dhe deklaron publikisht se nuk do shkojë te asnjë prej kuvendeve. I ftuar në emisionin “Dekalog” të gazetarit Roland Qafoku në RTSH24 Sulozeli dha edhe arsyet përse nuk do marrë pjesë:
“Kam zgjedhur të mos shkoj te asnjë kuvend të PD. Nuk shkoj për një arsye të vetme. Të dy liderët duhet të bëjnë hapa pas dhe jo hapa para. Kjo situatë nuk na çon asgjëkundi. Ata që do shkojnë në kuvend do marrin përfundimet e tyre, por problemi është se ku do shkojë PD. Zgjidhja për PD nuk është kjo, të shkojmë të përplasemi dhe pastaj demokratët të jenë të ndarë në dy palë. Do ishte shumë më mirë që presidenti i Partive Popullore Evropiane që është partneri i drejtëpërdrejtë i PD apo edhe një këshill të urtësh të negocionin dhe të ulnin palët që PD të mos shkojë në përplasje”.
