Kryesia e PD ka vendosur të përjashtojë përgjithmonë nga partia ish-kryeministrin Sali Berisha dhe 7 anëtarë të Komisionit të Rithemelimit. Mësohet se pas mbledhjes së djeshme, kryesia e selisë blu ka përjashtuar, Flamur Nokën, Bujar Nishanin, Albana Vokshin, Edmond Spahon, Arben Ristanin dhe Keltis Krujën. Një ditë më parë, Basha mblodhi kryesinë e Partisë Demokratike në selinë blu, dy ditë pas protestës së dhunshme të ish-kryeministrit Sali Berisha të shtunën e 8 janarit..
Mësohet se ky vendim u mor pas me shume se 8 orë diskutime.
Mbledhja e cila nisi rreth orës 19:00 dhe që ka përfunduar pas orës 3 të mëngjesit ka diskutuar në lidhje me protestën e organizuar nga Sali Berisha në ambientet e selisë blu.
Kujtojmë që ky vendim i kryesisë vjen tre ditë pas protestës së dhunshme që Sali Berisha organizoi në selinë e Partisë Demokratike.
Po si nisi “lufta” me Berishën?
Në 19 maj Departamenti Amerikan i Shtetit shpalli ish-kryeministrin Sali Berisha dhe familjen e tij person non grata. Menjëherë pas këtij vendimi, lideri i PD-së, Lulzim Basha përjashtoi nga grupi parlamentar ish-liderin e PD-së, Sali Berisha, deri në zgjidhjen e çështjes me Amerikën.
Në këtë periudhë, Berisha nisi të organizonte takimet e tij që i quajti Foltore dhe që sipas tij qëllim kishin rithemelimin e PD, duke pretenduar se Basha shkeli statutin me vendimin që mori për ta përjashtuar.
