Erërat e forta kanë rrëzuar drunj dhe shylla tensioni në lagjen Pejton të Prishtinës. Si pasojë një 30 vjeçar ka humbur jetën, pasi u godit nga një lis i vjetër dhe një tjetër ka mbetur i plagosur.
Sipas medieve kosovare, drurët kanë rënë mbi makinat e parkuara, të cilat tashmë janë dëmtuar plotësisht.
“Rreth orës 15:15 është pranuar informata se një lis është rrezuar dhe ka zënë dy persona. Policia menjëherë ka dalë në vendin e ngjarjes dhe nga informatat e para janë ngritur dyshimet se njëri nga të lënduarit mashkull, rreth 30 vjeç ka humbur jetën përderisa e lënduara tjetër femër po ashtu rreth 30 vjeç është dërguar në QKUK për trajtimin e nevojshëm mjekësor. Aktualisht policia ka nisur ndërmarrjen e veprimeve hetimore me synim sqarimin e rrethanave që karakterizojnë ngjarjen”, thuhet në njoftimin e Policisë.
