Drejtoria e Pergjithshme e Burgjeve ka ndërmarrë një iniciativë sensibiluese për dhurimin e gjakut, me moton “Dhuro Gjak, Shpëto Jetë”. Kësaj here ishte stafi Civil dhe ai i policisë në IEVP “Jordan Misja”, si dhe vetë Drejtori i Policisë së Burgjeve, zoti Paulin Rajta, që iu bashkuan nismës.
“Bëj dhuratën që nuk kushton asgjë. Dhuro gjak”, shkruhet në një postim në Facebook, në faqen e Drejtorisë së Përgjithshme të Burgjeve.
Solidariteti i stafeve policore dhe civile të burgjeve për kauzat sociale është fillimi i një vizioni, për një model më të mirë qytetarie në shoqërinë tonë.
Punonjësit e policisë së burgjeve duhen vlerësuar për iniciativën, pasi ata kanë treguar vlerat dhe cilësite më të mira, që mund të gëzojë njeriu, humanizëm, solidaritet dhe sakrificë.
Ky veprim është edhe shembulli më i mirë se si bashkëpunimi ndihmon njerëzit në nevojë, ndaj edhe duhet të jetë një nxitje për këdo, që të mos hezitojë, në të tilla raste si dhurimi i gjakut.
