Shqipëria do të luajë sonte ndaj Izraelit, në fushën e këtij të fundit. Kjo është ndeshja e parafundit e këtij edicioni të Ligës së Kombeve. Sikurse dihet, kërkohet fitorja, si i vetmi rezultat që vlen pastaj edhe për sfidën përmbyllëse ndaj Islanës në “Arena Kombëtare”, tri ditë më pas.
E thënë ndryshe, kuqezinjve iu nevojiten 6 pikë në këto dy ekliminatore për ta mbyllur të parët në grup dhe rrjedhimisht për t’u shortuar nga një pozicion më preferencial në fushatën kualifikuese të “Euro 2024”.
Trajneri Edy Reja iu ka dhënë fund dilemave për formacionin, kësaj here edhe duke ndryshuar modul. Në fakt, dyzimet më të mëdha kanë qenë për Asllanin dhe Uzunin. I pari ka luajtur pak me Interin, ndërsa beratasi ka një lëndim.
Sidoqoftë, 20-vjeçari duket se e ka kaluar “klasën” dhe pritet të jetë pjesë e mesfushës kuqezi nga fillimi, ndërsa Uzuni në stol. Për t’u riformatuar është mbrojtja, nisur nga mungesat e Kumbullës dhe Gjimshitit.
Duhet përmendur se kësaj here trajneri Reja do të ndryshojë skemë, duke kaluar nga mbrotja me tre në atë me katër lojtarë. Hysaj, Veseli, Ismajli dhe Balliu do të rreshtohen para Etrit Berishës.
Ndërkohë, mesfusha do të ketë në vijë të dejtë treshen Abrashi, Gjasula dhe Asllani.
Pak më i avancuar, por pjesë e këtij reparti, do të luajë Bajrami. Sulmi do të përbëhet nga dy forca: Cikalleshi dhe Broja.