Liverpool është përzgjedhur si qyteti ku do të mbahet Eurovision 2023, kanë konfirmuar Unioni Evropian i Transmetuesve (EBU) dhe BBC.
Finalja e Madhe e Eurovision Song Contest 2023 do të zhvillohet në Liverpool Arena të shtunën më 13 maj ndërsa gjysmëfinalet do të mbahen të martën më 9 maj dhe të enjten më 11 maj.
Ky është edicioni i 67-të të Eurovision, ndërsa në garë për qytetin mikëpritës ishte dhe Glasgow.
BBC, së bashku me Unionin Evropian të Transmetuesve (EBU), do të organizojnë Konkursin në konsultim me UA:PBC, transmetuesin publik të Ukrainës dhe fituesit e vitit të kaluar të konkursit.
“Liverpool është vendi ideal për të pritur Festivalin e 67-të të Këngës në Eurovizion në emër të Ukrainës. Qyteti është sinonim i muzikës dhe Liverpool Arena tejkalon të gjitha kërkesat e nevojshme për të organizuar një ngjarje globale të kësaj shkalle”, ka deklaruar mbikëqyrësi Ekzekutiv i Eurovision Song Contest Martin Österdahl.
