Argjentina fiton, bind, dhuron lojë dhe spektakël, e në fund siguron një biletë për në finalen e Botërorit. 3-0 ndaj Kroacisë, rival ky që deri më sot u kishte hapur punë shumë skuadrave.
Goli i parë do vinte prej një nga futbollistëve më të mirë në botë. Lionel Messi merr përsipër ekzekutimin e një penalltie dhe tregohet i saktë në minutën e 34-të.
Kundërsulmi vrasës brenda pjesës së parë nga kombëtarja e Albiceleste përfundon me gol nga ylli i Cityt, Alvarez.
Në pjesën e dytë, gjërat do ishin akoma më të thjeshta, pasi sërish Alvarez do vuloste një herë e mirë fatet e këtij takimi. Asist i njeriut të magjishëm, Messi.
Dorëzim pa kushte i Kroacisë, që u përpoq të mbajë kontrollin e topit, por pas pësimit të golit të parë në minutën e 34-t, u zhduk nga fusha dhe nuk arriti të shënojë qoftë edhe një gol nderi, duke mbyllur aventurën në Botëror, pikërisht në gjysmëfinale.
Nesër në mbrëmje Franca do të përballet me Marokun, sfidë prej ku do të përcaktohet edhe finalistja tjetër, skuadra që do të diskutojë trofeun me Argjentinën mbrëmjen e 18 dhjetorit.
