Zëvendësministri në Ministrinë e Infratrukturës dhe Energjisë Artan Shkreli ka dhënë detaje mbi projektin e qeverisë së Shqipërisë për të shembur godinat mbi 50-vjeccare, të cilat janë amortizuar.
I ftuar në “Now” Shkreli tha se ka pallate që janë në gjendje shumë të keqe dhe se ky proces duhet bërë në mënyrë të vazhdueshme, në mënyrë që të arrihet rindërtimi i vendit apo i godinave që kanë kaluar shumë vite e nuk janë në gjendje të banueshme.
Ai tha se qytetarët që jetojnë në ato pallate duhet të ndihen me fat që po u bëhet ky kontroll.
Pjesë nga intervista:
Artan Shkreli: Lidhet kryesisht me vetitë që kanë materialet e ndërtimit. Nuk janë të përjetshme. Sot është vështirë që të gjesh në Shqipëri më ndërtime me tulla apo qerpiç. Betoni pas disa dekadash, është e vërtetuar shkencërisht, humbet vetitë e tij. Kur u shpik, inxhinierët ishin të lumtur që u gjet një material i përjetshëm. Kështu që në këtë moment, meqënëse një pjesë e ndërtesave janë bërë me beton, jo vetëm betoni, por edhe llaçi….
Pyetje: Cilat janë zonat që preken?
Artan Shkreli: Nuk flitet për zona, çdo ndërtesë që kalon një moshë të caktuar, vite të caktuara, njësoj si njerëz, bëjnë një kontroll.
Pyetje: Sa godina 50-vjeçare kemi aktualisht, kemi shifra?
Artan Shkreli: Nuk jam në gjendje ta them, ka institucione që merren me këto statikstika
Pyetje: Për Tiranën apo jo
Artan Shkreli: Jo është njësoj për të gjithë Shqipërinë, është një process që nuk mbaron, nuk skadon.
Pyetje: A u bë verifikimi i këtyre godinave pas tërmetit, kaluan në sitë?
Artan Shkreli: Në sitë kaluan vetëm ato godina që ishin prekur dhe u dhanë sinjale.
Pyetje: Çfarë ndodh me ato objekte dhe pallate që pasi bëhet ekspertiza, vendoset që do shembet?
Artan Shkreli: Sigurisht, është dhe fat që banorët që jetojnë në pallate të pasigurta kanë mundësinë të bëjnë një radiografi të banesës ku jetojnë. Jo vetëm për tërmetet por për çdo gjë tjetër që vjen nga rrethanat e tjera, si ndërhyrjet në katet e para. Do të objekte që do të kenë nevojë për ndërhyrje aq të thella saqë më mirë ta shembësh e ta rindërtosh, se sa të ndërhysh. Objekte të tilla janë realisht pak.
Sipas një vprojektvendimi të Qeverisë, të gjithë objektet, që kanë mbi 50 vjet që janë ndërtuar do të duhet t’i nënshtrohen auditimit teknik. Kjo do konsistojë në kryerjen e ekspertizës së thelluar për të vlerësuar gjendjen teknike aktuale dhe kapacitetin mbajtës të objekteve. Në rast se vlerësohet se objekti nuk përmbush kushtet teknike, i hapet rruga riparimit ose prishjes”. Sipas projektvendimit të qeverisë subjektet që do të bëjnë auditimin teknik të objekteve do përzgjidhen nga njësitë e vetëqeverisjes vendore dhe jo nga vetë pronarët e objekteve. Ndërkohë që, auditimi teknik do i vihet në dispozicion Institutit të Ndërtimit për kryerjen e oponencës.
