Koalicioni për Reforma Integrim dhe Institucione të Konsoliduara (KRIIK) konstaton parregullsi dhe shkelje ligjore në fushatën elektorale për zgjedhjet lokale të 14 majit. Në një letër të hapur publike, drejtuar kryeparlamentares, presidentit, kryeministrit, partive politike dhe përfaqësive diplomatike KRIIK i kujton subjekteve politike se klima zgjedhore duhet të jetë e qetë për të moscënuar shprehjen e lirë të qytetarëve.
“Kjo klimë zgjedhore e qetë është mëse e nevojshme për t’i bërë qytetarët të ndihen të sigurt për shprehjen e lirë dhe të pacënuar të vullnetit të tyre, duke iu dhënë të kuptojnë se procesi zgjedhor është i tyre, si një mundësi për të zgjedhur më të mirën e ofertave elektorale të paraqitura nga subjektet zgjedhore, për mirëadministrimin e qeverisjes vendore”-thuhet në letër.
Më tej shtohet se është detyrë e shtetit, i cili nëpërmjet ligjit dhe institucioneve, të Institucionit të KQZ-së veçanërisht, të kujdeset për pacënueshmërinë dhe mos-ndikimin apo mos-orientimin në asnjë rast të votuesit shqiptar, duke vënë në funksion mekanizma parandalues dhe sanksionues ndaj tërë formave të pushtetit, qoftë ai politik, shtetëror, ekonomik apo edhe kriminal. Në monitorimin që KRIIK ka krye përgjatë javëvëve të fundit, ku fushata elektorale ka nisur para kohë, konstatohet pjesëmarrja e e deputetëve në aktivitete të institucioneve shtetërore, veçanërisht në bashkitë e vendit.
“Lidhur me këtë çështje, KRIIK ka shprehur Qëndrimin e tij zyrtarisht në KQZ, por edhe publikisht, duke e konsideruar të paligjshme prezencën e përfaqësuesve politikë, qofshin këta edhe deputetë, në veprimtaritë e përditshme të Administratës së Bashkisë dhe Kryetarit të saj, që këta të fundit zhvillojnë konform përgjegjësive dhe detyrave të tyre funksionale rutinë[iii], të cilat, sipas gjykimit të KRIIK dhe bazuar në parashikimet ligjore të Ligjit, nuk përputhen në asnjë pikë me përgjegjësitë dhe funksionet e Deputetit të Kuvendit të Shqipërisë”-thuhet në konstatimin e KRIIK.
Kjo organizatë e monitorimit të zgjedhjeve ka renditur disa raste të shkeljeve për të cilat ka vënë në dijeni KQZ-në për të marrë masat përkatëse. “KRIIK Ju nxit të ndërmerrni hapat e nevojshëm për të orientuar e këshilluar të gjithë deputetët për zbatimin me korrektësi të ligjit, duke mos abuzuar në asnjë rast me postin dhe funksionin publik që mbajnë, duke respektuar katërcipërisht kuadrin ligjor dhe Kodin e Sjelljes së Deputetit, veçanërisht gjatë fushatës zgjedhore”-thuhet në letrën drejtuar institucioneve të rëndësishme në vend, partive politike dhe përfaqësive të huaja diplomatike në Shqipëri.
