Opozita në Kosovë po fajëson kryeministrin Albin Kurti për dështimin e mbledhjes së përbashkët të dy qeverive, Kosovë-Shqipëri.
Sipas Partisë Demokratike të Kosovës dhe Lidhjes Demokratike të Kosovës, Kurti po humb çdo aleat dhe mik të Kosovës. PDK dhe LDK shprehën shqetësimin se raportet Kurti-Rama mund të ndikojnë në përkeqësimin e marrëdhënieve mes dy shteteve.
Në anën tjetër, në Lëvizjen Vetëvendosje, partinë në pushtet, fajin për dështimin e mbledhjes së përbashkët ia adresojnë kryeministrit Rama.
Deputeti i PDK-së, Mërgim Lushtaku thotë për KosovaPress se Kurti po i largon aleatët dhe miqtë, në momentin kur i duhen vendit më së shumti.
Megjithatë, ai shton se Kurti dhe Rama duhet të ulen dhe të gjejnë një zgjidhje për të ecur përpara në thellimin e bashkëpunimit Kosovë-Shqipëri.
Anulimin e mbledhjes së përbashkët të qeverive, Kosovë-Shqipëri e sheh shqetësuese edhe deputetja e LDK-së, Rrezarta Krasniqi.
Por, ndryshe e vlerëson deputetja e LVV-së, Fitore Pacolli, e cila thotë se Kosova do të vazhdojë të jetë e përkushtuar për thellimin e bashkëpunimit ndërmjet Kosovës dhe Shqipërisë.
Ajo kërkon nga Shqipëria të mbështesë Kosovën dhe jo të jetë në anën e Serbisë për situatën në veri.
