Gjykata e Prizrenit ka caktuar ditën e sotme masat për tre mjekët e arrestuar të mërkurën pas vdekjes së foshnjës në spital.
Tre mjekët akuzohen se kanë vepruar në mënyrë të pakujdesshme me rastin e lindjes së fëmijës, derisa gjendja e të porsalindurit është përkeqësuar. Sipas gjykatës, të pandehurit kanë ndërhyrë me vonës duke mos arritur ta shpëtojnë foshnjën.
Për dy nga mjekët e arrestuar është dhënë masa e sigurisë “arrest shtëpie” ndërsa për tjetrin është caktuar masa “detyrim paraqitje”.
“Më datë 27 qershor, rreth orës 03:40 në Spitalin Rajonal të Prizrenit të pandehurit në cilësinë e mjekëve kujdestarë veprojnë haptazi në mënyrë të pakujdesshme si ekip i mjekëve me rastin e lindjes së fëmijës, derisa i është renduar dhe përkeqësuar gjendja e të dëmtuarës (pacientes), dhe e fëmijës, me ç ‘rast pasi kuptojnë për gjendjen e të dëmtuarës dhe fëmijës ekipi i mjekëve – të pandehurit intervenojnë me vonesë mirëpo fëmija i porsalindur nuk arrin të mbijetoj – vdesë.
Gjithashtu, më datë 27 qershor, rreth orës 03:40 në Prizren, në Spitalin Rajonal të Prizrenit të pandehurit në cilësinë e mjekëve kujdestarë fshehin, ose e bëjnë të pashfrytëzueshëm, tërësisht sendin – provën kryesore me qëllim të pamundësimit të shfrytëzimit të sendit në procedurë zyrtare, në atë mënyrë që pas lindjes, të pandehurit placentën e fetusit të fëmijës të posa lindur i cili ndërron jetë pas lindjes, me qëllim që të fshehin çështjen e të provuarit lidhur me shkakun e vdekjes së foshnjës këtë placentë nuk e regjistrojnë dhe identifikojnë dhe e vendosin së bashku duke e përzier me placentat tjera në vendin ku i ruajnë, nuk e dërgojnë në IML së bashku me trupin e pajetë të foshnjës i cili është dërguar në autopsi me urdhër të prokurorit, e cila provë është vendimtare për përcaktimin e shkakut të vdekjes”, shkruhej në njoftimin e Gjykatës.
Ngjarja e rëndë ndodhi ditën e djeshme në spitalin e Prizrenit, ku ndërroi jetë foshnja e porsalindur. Denoncimi në polici u bë nga babai, i cili është ankuar se pas lindjes së gruas së tij në Spitalin e Prizrenit, foshnja ka vdekur pas disa minutash. Ai akuzoi mjektët për neglizhencë.
