Elton Qyno
Materiali kallëzues i Agjensisë së Mbikqyrjes Policore që flet për ndërhyrjen në sistemin TIMS të Policisë së Shtetit, ende nuk është rregjistruar si procedim penal në prokurorinë e kryeqytetit.
Dosja hetimore e AMP-së që u depozitua me shumë urgjencë në prokurori, nuk ka një emër prokurori që do hetojë skandalin e vjedhjes së të dhënave.
AMP-ja, ka referuar rastin për hëtime të mëtejshme në datën 21 gusht 2023, ndërsa deri në këtë fazë dosja nuk ka një emër prokurori. Kjo pasi pjesa dërmuese e prokurorëve janë me pushime gjatë ditëve të Gushtit.
Pritet që me nisjen e muajit Shtator 2023, kjo çështje të hidhet në short, për tu përcaktuar emri i prokurorit që do hetojë rastin.
Më heret, drejtori i Departamentit të Teknologjisë dhe Informaciont pranë Policisë së Shtetit, Ervin Muça, u pezullua nga detyra me urdhër të drejtorit të përgjithshëm të Policisë së Shtetit, në lidhje me këtë skandal
Muça, kishte urdhëruar vartësit e tij të eksportonin të dhënat e TIMS në një hard-disk të jashtëm.
Ishte një nga punonjësit që menjëherë përmes një email-i vendosi në dijeni Drejtorinë e Përgjithshme të Policisë duke ngritur shqetësimin se këto të dhëna po dalin jashtë institucionit.
Ka dyshime se Muça mund të ketë bashkëpunuar edhe me persona të tjerë për marrjen e të dhënave sensitive ku përfshihen të gjitha hyrjet dhe daljet e shtetasve shqiptarë dhe të huaj si dhe informacionet për personat e shpallur në kërkim.
Kallëzimi i AMP-së erdhi, pas shqetësimit të ngritur më heret nga Ambasada Amerikane.
Në një takim të të ngarkuarit me punë të Ambasadës Amerikane në Tiranë Martin McDoëell me ministrin e Brendshëm Taulant Balla, u ngrit shqetësimi në lidhje me shkeljet në sistemin TIMS, për të cilat u kërkua një hetim i plotë.
