Gjykata e Tiranës pranon kërkesën e Alda Klosit, Havier e Rozeta Dobit për gjykim të shkurtuar dhe në datë 19 mars Prokuroria e Tiranës pritet të japë konkluzionet përfundimtare.
Klosi, ish- shefe e kabinetit të ish-zv. Ministrit Arben Ahmetaj akuzohet deklarim të rremë, fshehje pasurie dhe deklarim të rremë para OPGJ.
Ndërkohë sanitarja Rozeta Dobi dhe i biri Havier Dobi akuzohen për veprën penale të vjedhjes me pasoja të rënda kryer në bashkëpunim. Për Alda Klosin hetimi pasuror është veçuar dhe po vijon hetimi.
Arrestimi i Alda Klosit u bë pasi ajo denoncoi sanitaren Rozeta Dobi se i kishte vjedhur një shumë prej 120 mijë eurosh në banesë.
Ndërkohë gjatë kontrolleve të mëvonshme në shtëpinë e pastrueses, janë gjetur veç 120 mijë eurove edhe një shumë tjetër prej 400 mijë eurosh në tubin e aspiratorit. Dobi deklaroi se edhe këto para i kishte vjedhur në shtëpinë e Klosit, e më pas se ja kishte dhënë vetë ish-zyrtarja, për t’ia ruajtur pasi kishte konflikte me ish-bashkëshortin. Klosi nuk mund të justifikojë shumën e madhe të parave që kishte, e po ashtu dhe shumë prona që zotëronte./O.S
