Mbrojtësi që ndodhet në formë huazimi te Barcelona, Joao Cancelo, i cili aktualisht ndodhet i grumbulluar me kombëtaren e Portugalisë ka “shpërthyer” ndaj trajnerit Pep Guardiola dhe klubit që ka në pronësi kartonin e tij, Manchester City-t.
Në një prononcim të dhënë për mediet, Cancelo deklaroi se Guardiola ka gënjyer për të, ndërsa shtoi se klubi i City-t është treguar mosmirënjohës ndaj tij.
“Guardiola ka gënjyer, nuk është e vërtetë që isha një shok i keq në skuadër. Ju mund të pyesni Ake ose Rico. Unë nuk kisha ndonjë kompleks superioriteti ndaj tyre. Mendoj se, në përgjithësi, Manchester City u tregua mosmirënjohës ndaj meje”-tha Cancelo.
Marrëdhëniet e tensionuara mes Joao Cancelo-s dhe trajnerit të Manchester City-t, Pep Guardiola-s, kanë bërë që mbrojtësi t’i kalojë sezonet e fundit në formë huazimi te Bayern Munich dhe tashmë te Barcelona.
