Prej mëngjesit të ditës së sotme, faqja e deklarimeve tatimore e sistemit e-Filing nuk ka funksionuar.
Sot është afati i fundit i pagesave të sigurimeve shoqërore dhe shëndetësore, si dhe pagesës së tatimit në burim për subjektet përkatëse. Afati për deklarimin e tyre është jo më vonë se data 20 e muajit që pason periudhën tatimore, por meqë 20 Prill ishte e Shtunë, deklaratat kalojnë për dorëzim ditën e sotme, më dt. 22.04.2024.
Një Kontabiliste e miratuar deklaroi për shqiptarja.com se nuk ka mundur të logohet në sistem normalisht, duke përdorur të dhënat e përdoruesit. Logimi mund të bëhet sidoqoftë, vetëm nëpërmjet e-albania.
Sistemi i tatimeve ka probleme ne logimin normal të tij. Pavarësisht se logohesh nëpërmjet e-albanias, metodës tjetër, sistemi nuk ruan dhe nuk pranon deklaratat me afat deri më dt 22.04.2024. Sistemi nuk të lejon as të përdorësh ‘Cështjet e Mia”, opsion i nevojshëm për ngritjen e çështjeve që lidhen me aktivitetin e biznesit. Ndërsa shumë subjekte po paguajnë detyrimet tatimore duke shfrytëzuar kodet e muajve të kaluar, në rend rritës, për të shmangur kamatvonesa të mundshme’:-bën ditur ajo.
Sot është afati i fundit për deklarimin e sigurimeve shoqërore dhe shëndetësore, si dhe tatimit në burim. Nga Drejtoria e Përgjithshme e Tatimeve u tha se shkak është rënia e sistemit dhe po punohet për funksionimin e sistemit. Edhe në raste të mëparshme të mosfunksionimit të sistemimit ndaj tatimpaguesve nuk ka pasur penalizime.
