Simptomat e sindromës së vezores policistike (PCOS) u bënë aq të vështira për një grua, sa ajo nuk donte të jetonte. Angharad Medi Lewis, nga Carmarthenshire, tha se periodat “e turpshme” dhe qimet e tepërta në fytyrë e bënë atë të mos dëshironte të largohej nga shtëpia.
Eksperti i neuroendokrinologjisë, Prof Aled Rees, tha se ndikimi që PCOS ka në shëndetin mendor nuk është shumë i njohur. Zonja Lewis, 41 vjeç, nga Llanybydder, u diagnostikua me këtë sëmundje 20 vjet më parë. Ajo tha se vuante nga simptomat më të zakonshme, por nuk e kuptonte ndikimin që kishte në shëndetin e saj mendor. “Kisha perioda shumë të rënda, kisha dhimbje të forta për një javë të tërë çdo muaj, më rriteshin qime në fytyrë, isha në ankth,”- tha ajo. Simptoma të tjera mund të përfshijnë vështirësi për të mbetur shtatzënë, shtim në peshë, rrallim i flokëve ose lëkurë të yndyrshme. “Nuk e kisha kuptuar se sa keq kishte ndikuar në shëndetin tim mendor në atë kohë”,- tha Lewis.
Zonja Lewis dhe burri i saj Andrew, filluan të përpiqeshin për një familje në 2006 dhe kishin nevojë për trajtim IVF. Kjo nënkuptonte ndalimin e mjekimit të saj kontraceptiv që kishte ndihmuar në lehtësimin e simptomave të PCOS. Pikërisht atëherë gjendja e saj mendore filloi të përkeqësohej. “Kam arritur pikën e thyerjes. Ajo po kontrollonte jetën time. Para se të shihja mjekun në vitin 2019, kisha arritur në një pikë ku nuk doja të jetoja më. Fytyra ime ishte me qime, dhimbjet, vetëm funksionimi nga dita në ditë ishte i vështirë”.
Znj. Lewis iu përshkruan ilaçe kundër depresionit në vitin 2019 dhe u këshillua që t’i jepte përparësi shëndetit të saj mendor. Në fund të fundit, kjo nënkuptonte ndalimin e trajtimit IVF dhe kthimin te mjekimi që kontrollonte PCOS.
Çfarë është PCOS?
PCOS është një gjendje e zakonshme që ndikon në funksionimin e vezoreve të një gruaje. Shkaku i saktë nuk dihet, por shpesh shfaqet në familje dhe lidhet me nivelet jonormale të hormoneve në trup, duke përfshirë nivelet e larta të insulinës. Vezoret polikistike përmbajnë një numër të madh folikujsh të padëmshëm me madhësi deri në 8 mm (afërsisht 0.3 in). Folikulat janë qese të pazhvilluara në të cilat zhvillohen vezët. Në PCOS, këto qese shpesh nuk janë në gjendje të lëshojnë një vezë, që do të thotë se ovulimi nuk ndodh.
Burimi bbc.com
