Komisioni Qendror Zgjedhor do të vendosë nesër se si do të procedojë me Bashkinë Himarë. Humbja e mandatit të Fredi Belerit, për shkak të shpalljes fajtor nga gjykata, por edhe arrestimi i ish-kryetarit Jorgo Goro bën që në shtator KQZ të bëjë gati infrastrukturën për të shkuar drejt zgjedhjeve të parakohshme. A do kemi një përballje Beleri i ri, Vangjel Tavo?
Bashkia e Himarës pritet të shkojë në ripërsëritjen e zgjedhjeve për të mandatuar kryetarin e saj të ri. Kandidati i koalicionit “Bashkë Fitojmë” Fredi Beleri u zgjodh kryetar, pr arrestimi për shitblerje votash dhe më pas dënimi nga gjykata ka bërë që të humbë mandatin, duke mos e gëzuar asnjë ditë. Situata në Himarë është më shumë se paradoks, pasi për disa muaj humbësi i zgjedhjeve Jorgo Goro mbajti detyrën, por edhe ai u arrestua për tjetërsim pronash dhe falsifikim dokumentesh. Tashmë Fredi Beleri zyrtarisht nuk mund ta mbajë mabnatin si për shkak të dënimit, ashtu edhe zgjedhjes së tij si Deputet i Parlamentit Europian nën “flamurin grek”. Në Himarë ka zëra të shtuar se koalicioni Bashkë Fitojmë mund të nxjerrë si kandidat djalin e Fredi Belerit, ndërsa PS e ka thaujse të zyrtarizuar pasi kryeministri Edi Rama po “shëtit” në Himarë Vangjel Tavon, duke e paraqitur si të duhurin për këtë bashki. Tashmë pas arrestimit dhe procedimit të Jorgo Goros, dhe dy të komanduarve, Komisioni Qendror Zgjedhor do të vendos ditën e enjte për fatin e Bashkisë Himarë. KQZ do të shqyrtojë shqyrtimin e vlefshmërisë së mandatit të Kryetarit të Bashkisë Himarë, Dhionisios (Alfred) Beleri. Beleri u akuzua edhe u dënua për korrupsion në zgjedhjet lokale nga të cilat u zgjodh kryebashkiak i Himarës. Por gjatë 13 muajve në paraburgim ky mandat nuk u bë funksional pasi ai nuk u betua. Pasoja direkte e vendimit të apelit është humbja e mandatit si kryetar i zgjedhur i bashkisë Himarë. Gjykata e Apelit të Posaçëm e gjeti fajtor Belerin. Ndaj tij qëndroi në fuqi dënimi dy vjet burg për korrupsion aktiv në zgjedhje. Me shpalljen fajtor të Fredi Belerit, Himara shkon në zgjedhje.
Procedurat
Pas marrjes së vendimit të Gjykatës së Posaçme të Apelit, kreu i Qeverisë do të duhet të vërë në dijeni Presidentin për mbajtjen e zgjedhjeve të parakohshme në bashkinë e Himarës. Nga marrja në dijeni kreu i shtetit do të duhet të vendosë brenda 40 ditëve për datën e zgjedhjeve. Mbetet për tu parë nëse qeveria do t’i ndjekë shpejt procedurat për të çuar Himarën në zgjedhje të parakohshme, që u bë edhe shkak i ngrirjes së marrëdhënieve mes Shqipërisë dhe Greqisë. Nuk përjashtohet mundësia që afatet kushtetuese të shkelen për shkak se përpara është vera e nxehtë dhe zgjedhësit janë me pushime. Rasti më i freskët është ai i zgjedhjeve të parakohshme në bashkinë e Kukësit. Sipas afateve kushtetuese ato do të duhet të zhvilloheshin brenda gushtit, por afatet u shkelën dhe kryebashkiaku i ri i Kukësit u zgjodh në fundin e shtatorit të një viti më parë. Deri sa politika të vendosë se kur zgjedhësit e Himarës do të thirren para kutive të votimit, PS dhe PD do të duhet të nxjerrin kandidatët e tyre. Jo zyrtarisht nga kampi rozë emri më i mundshëm është minoritari grek Vangjel Tavo. PS e rifuti në politikë duke e emëruar prefekt të qarkut të Vlorës. Ai shihet si kandidatura më e mirë që në rast fitore do të lehtësojë komunikimin mes Tiranës dhe Athinës zyrtare. Për shkak të çështjes “Beleri” marrëdhëniet mes dy vendeve fqinje u ngrinë, aq sa Greqia vendosi veton dhe mban ende të bllokuar hapjen zyrtare të negociatave anëtarësuese të Bashkimit Evropian me Shqipërinë. Në vendoret e një viti më parë, socialistët e humbën Himarën. Ajo u fitua me 19 vota më shumë nga kandidati i opozitës Fredi Beleri por që nuk u ul asnjëherë në karrigen e kryebashkiakut.