Në Tiranë, një nga situatat që ndeshet më shpesh është ajo e të përballurit me lypsat e rrugës. Disa janë të qetë, nuk bezdisin, urojnë kalimtarët që ju dhurojnë lëmoshë dhe luten me sytë plot shpresë edhe për ndonjë ndihmë sado të vogël.
Duket se shpresa e tyre qëndron në xhepat e kalimtarëve herë moskokëçarës, e herë humanistë.
Si për ironi të fatit kjo dukuri ndodh më shpesh në zonat më me emër të Tiranës, aty ku dukshëm përplasen mizorisht të dyja botët: nga njëra anë makina luksoze dhe nga ana tjetër njerëz që tërhiqen zvarrë duke lypur lëmoshë, nga njëra anë kundërmojnë parfumet më të shtrenjta të kohës dhe nga ana tjetër një aromë e pakëndshme përhapet në ajër.
Por jo të gjithë ata që kanë zgjedhur të fitojne përmes lypjes nuk janë kaq të sjellshëm sa të presin me sytë nga Zoti dhe nga njerëzit. Ata hidhen direkt në aksion, sapo të shohin në rrugë, duke t’u “qepur” pas dhe nuk të lënë të vazhdosh rrugën nëse nuk ju dhuron diçka.
Nëpër lokale kjo situatë bëhet akoma më e bezdisshme.
Kafja me një mik, një bisedë pune apo personale, mund të ndërpritet sa hap e mbyll sytë nga njerëz që vijnë të kërkojnë lek a thua se duhet të paguash këstin e kredisë kaq detyrimisht. Situatat pastaj fillojnë dhe agravohen kur nuk largohen, ose dhe kur të prekin me dorë. Dhe kjo nuk është normale! Nuk duhet të normalizohet!
Fjala.al ka siguruar një video ku kjo situatë bëhet e bezdisshme dhe e pazgjidhme.
Ndoshta institucionet përkatëse duhet të ndërhyjnë në rregullimin e kësaj dukurie, në mënyrë që situatat të mos agravojnë më keq. Duke nisur që nga policia bashkiake, qendrat për kujdesion social etj, duhet të bëhen bashkë për t’i dhënë zgjidhje një herë e mirë këtyre ngjarjeve të pakëndshme.
