Vdekja jote, jeta ime. Kjo frazë përmbledh atë që ka ndodhur në Turqi ditët e fundit, pasi ndalimi i përkohshëm i kryebashkiakut të Stambollit, Ekrem Imamoglu, do të përcaktojë mbijetesën politike të politikanit të arrestuar dhe të presidentit turk, Rexhep Tajip Erdogan.
Dita më kritike për të ardhmen e Imamoglu është e diela. Pas 48 orësh, pra të dielën, më 23 mars, përfundon ndalimi i përkohshëm 4-ditor i Ekrem Imamoglut dhe gjyqtarët turq do të duhet të vendosin nëse kryetari i Stambollit do të lirohet apo nëse ndalimi i tij i përkohshëm do të shndërrohet në paraburgim.
Kryebashkiaku i Stambollit i arrestuar përkohësisht rrezikon të dënohet deri në 38 vjet, apo edhe më shumë, sipas mediave turke. Me vendime gjyqësore në Turqi janë sekuestruar të gjitha pasuritë e Ekrem Imamoglut dhe të gjitha bizneset që ai zotëronte.
Megjithatë, nëse Imamoglu nuk do të lihet në paraburgim dhe do të lirohet me kusht, ai do të bëhet një hero popullor në sytë e miliona qytetarëve turq, por edhe në mbarë botën. Në këtë skenar, natyrisht, reputacioni i Tajip Erdogan do të marrë një goditje të madhe dhe ndoshta vendimtare, me sloganin ” heroi i popullit kundër diktatorit” që dominon rrugët, rrugicat dhe sheshet e Turqisë.
Katër rrugët për Ekrem Imamoglu
Mund të lirohet: Në këtë rast, ai do të kthehet në detyrën e tij si kryebashkiak i Stambollit.
Por, edhe nëse lirohet, ka mundësi që të shkarkohet: Ministria e Brendshme mund të vendosë shkarkimin e tij dhe emërimin e një administratori për Bashkinë e Stambollit, duke përdorur si argument hetimet në vazhdim ndaj kryebashkiakut.
Ai mund të arrestohet me akuza për terrorizëm: Nëse ai mbahet në paraburgim me akuzën e “dhënies së ndihmës për një organizatë terroriste”, Ministria e Brendshme mund të emërojë një kryebashkiak të ri në Stamboll.
Nëse ai arrestohet me akuzën e krimit të organizuar, Këshilli Bashkiak Metropolitane i Stambollit mund të zgjedhë një kryetar të ri.
Natën të gjithë kanë frikë të dalin jashtë
Për të dytën natë radhazi, protestat e qytetarëve vazhduan në rrugët e Turqisë , pavarësisht ndalimit të tubimeve.
Policia turke përdori kimikate, plumba plastikë dhe gaz lotsjellës kundër turmës që ishte mbledhur para bashkisë së Stambollit.
Sipas korrespondentëve të AFP-së, policia donte të parandalonte një grup protestuesish të rinj që po përpiqeshin të niseshin drejt Sheshit Taksim , një vend emblematik proteste, i cili është bllokuar plotësisht me kangjella metalike.
Ndalimi i demonstratave edhe në Izmir
Sot, të premten, u njoftua se masa e ndalimit të demonstratave po vendoset edhe në qytetin e Izmirit, bastioni më i fortë i Partisë Popullore Republikane (CHP), partia e krijuar nga themeluesi i Turqisë moderne, Kemal, dhe e cila Ekrem Imamoglu donte të ishte kandidati për postin e presidentit të Turqisë, kundër Erdoganit, mandati i dytë i të cilit përfundon në vitin 2028.
Demonstrata të reja sot
Pavarësisht ndalimit që është vendosur, sot në qytetet e Turqisë po organizohen demonstrata të reja në mbështetje të kryebashkiakut të Stambollit Ekrem Imamoglu, dy ditë pas arrestimit të tij. Në total, që nga e mërkura, ditën e arrestimit, protesta janë zhvilluar në 29 nga 81 provincat e Turqisë.
“Tani askush nuk duhet të presë që Partia Popullore Republikane (CHP) të bëjë politikë në salla dhe ndërtesa. Që tani e tutje jemi në rrugë dhe sheshe”, tha kreu i partisë më të madhe opozitare turke, Ozgur Ezel, dje para bashkisë së Stambollit ku ishin mbledhur disa mijëra protestues.
Aplikacioni Whatsapp, Instagram dhe Youtube u rihapën
Kufizimet për aksesin në rrjetet sociale dhe platformat e mesazheve (X, WhatsApp), të cilat ishin vendosur që nga mëngjesi i së mërkurës, u hoqën mbrëmë , sipas një organizate turke që monitoron internetin. Gjithsej 54 përdorues të internetit janë arrestuar që nga e mërkura për mesazhe në rrjetet sociale që u konsideruan “provokuese” nga autoritetet turke, njoftoi sot Ministria e Brendshme turke. / S,M
