Kanë kaluar 50 ditë pas tërmetit të 26 nëntorit, dhe për të kuptuar se si po menaxhohet situata, ekipi i Fjala.al ka shkuar drejt Thumanës, një prej zonave më të prekura të tragjedisë. Në qendër të Thumanës turmat e njerëzve prisnin në qendrat për të aplikuar për të rindërtuar shtëpitë e tyre të pabanuara.
Është pikërisht “një luftë moderne klasash”, që banorët pretendojnë se i ka penalizuar për të marrë ndihmën e tyre. Të demoralizuar dhe në stres nga varfëria, e cila është thelluar si pasojë e një fatkeqësie natyrore, ata bëjnë apel për ndihmë.
Pasi shtëpitë e tyre u bënë të pabanuara ata nuk do përballen vetëm me problemin e vendbanimit dhe mungesës së ndihmës. Ajo që bie në sy në këtë zonë është se banesat dalin në emër të personave të tjerë si pasojë e një problemi me legalizimet e cila bie ndesh dhe me pronësinë. Qeveria nga ana e saj ka deklaruar se nuk do marrë përsipër që të bëjë me banesë personat të cilët nuk zotëronin shtëpitë në emrin e tyre.
Të gjendur mes një lëmshi i cili nuk ju siguron dot as bazën jetike të mbijetesës e cila është banesa, banorët e Thumanës nuk e kanë aspak kompleks të shprehen se janë të pashpresë dhe në depresion.
Edhe ata që kanë patur banesën e tyre, tashmë e vetmja nismë që është ndërmarrë është përcaktimi nëse banesa e tyre është ose jo e banuar dhe disa çadra të cilët banorët i konsiderojnë si çadra plazhi. Disa prej tyre kanë zënë magazinat kur dikur i përdornin për të mbajtur pulat dhe të tjerë flenë në kasolle në mes të të ftohtit të dimrit.
Në tërmetin e 26 nëntorit në Thumanë u shembën 3 pallate ku humbën jetën 25 viktima nga 51 që pati në total kjo tragjedi./Fjala.al
https://youtu.be/DStlj98hRYg
