Kryetari i Partisë Demokratike, Lulzim Basha ka publikuar një sekuencë të një deklarate të tij, ku akuzon qeverinë se nuk ka një plan për menaxhimin e pandemisë.
Basha ka thënë se pa plan nuk e luftojmë dot pandeminë, ndërkohë që shton se qeveria duhet të ketë në prioritet shëndetin dhe jetën e shqiptarëve.
“Ditën e djeshme Rama tha se shkollat nuk janë vatra infeksioni. Sot ka deklaruar mbylljen e pjesshme të shkollave.Për këdo që I ka dëgjuar këto dy deklarata në më pak se 24 orë, është e qartë që Rama ka dështuar me kontrollin ndaj pandemisë. Tregon që nuk ka plan, çfarë thotë sot nuk e thotë nesër dhe pa plan nuk e luftojmë dot pandeminë. Nuk e fitojmë dot betejën për të mposhtur pandeminë dhe për të shpëtuar jetë njerëzish me vendime kuturu. Kjo siç e dini ka qenë edhe shqetësim kryesor dhe thirrja ime kryesore dhe vazhdon të mbetet preukopimi im kryesor.
Duhet një qeveri e përgjegjshme e cila lë gjithçka tjetër, gjithçka tjetër është sekondare. Sot jeta, shëndeti dhe ekonomia e shqiptarëve është prioritare”, ka thënë Basha.
