Për atë civil që punon me ushtarakët elementi i parë që i bie në sy është rregulli, disiplina dhe atdhedashuria. Por pak e thonë këtë. Ndryshim dhe dallim bën Mimi Kodheli, ish-ministrja e Mbrojtjes. Gjatë emisionit HARD TALK NGA ROLAND QAFOKU ajo tha se ushtarakët janë pjesa më e mirë e shoqërisë.
-A kemi ne atë rol që duhet të kemi në NATO dhe unë këtë e lidh edhe me atë kushtin e NATO-s që buxheti shqiptar duhet të jetë 2% të buxhetit të shtetit dhe ne këtë s’e kemi arritur asnjëherë që nga koha kur Shqipëria është bërë anëtare e NATO-s?
-Unë kam pasur nderin e madh të jem gruaja e parë që ka mbajtur postin e ministres së Mbrojtjes. T’iu them të drejtën ka një qasje ndryshe midis grave dhe burrave. Problemi i mbrojtjes është një problem që duhet t’iu shpjegohet njerëzve më thellë, më gjatë, më shpesh, në mënyrë të qëndrueshme. Sepse forcat e armatosura janë një trupë e cila nuk duket në ditët tona të zakonshme. Nuk shikohen në rrugë si forcat policore, nuk shikohen përditë si mjekët, nuk shikohen përditë si mësuesit, pra duhet të krijohet ideja që kjo është një strukturë që na duhet. Të qenit brenda aleancës është mbase ngjarja më e madhe dhe e rëndësishme për Shqipërinë pas ndryshimeve të mëdha të sistemit. Për të siguruar mbrojtjen duhen ca para të cilat nuk duken, nuk janë të prekshme përditë. Por forca e armatosur është aty për të mbrojtur atdheun. Është aty për të mbrojtur kufijtë, është aty në emergjencat civile, është aty në shërbime madhore që i jepen vendit. Sigurisht është aty edhe për prestigj. Forcat e armatosursa të Shqipërisë janë pjesa më e mirë e shoqërisë sonë. Këtë nuk e them sepse i kam drejtuar ata për 4 vjet, por sepse i kam njohur nga brenda kam ditur ç’do të thotë kjo gjë, dhe dua patjetër ta ndaj me publikun pa egzagjërime./fjala.al/Ke.Ba
