Tomori mundi 1-0 Besën në Berat, takimi erdhi drejtpërdrejt në RTSH Sport. Edhe niveli i dytë i Kampionatit Kombëtar të Futbollit ka luajtur të shtunën 5 prej takimeve të javës së 8-të, ku mbizotëruan fitoret e vendaseve dhe barazimet.
Mikel Canka ka mjaftuar që Tomori i Bledar Sinellës të marrë tre pikët ndaj Besës në sfidën që ka ardhur drejtpërsëdrejti në rrjetin e Radio Televizionit Shqiptar dhe të bëjë kthesën e rezultateve.
Beratasit e gjejnë atë që i duhet në të 37-ën minutë, ndërsa Canka rrëmben një top të kthyer nga mbrojtja beratase e në pozicion diagonal me portën kavajase shënon. Tomori i gëzohet kështu 3-pikëshit të tretë të sezonit.
Ndërkohë në ndeshjet e tjera në grupin A, Besëlidhja është ndalur në një barazim pa gola me Orikun, kurse Korabi ka gjetur fitoren ndaj Erzenit. Në grupin B, pas Tomorit edhe Pogradeci fiton në fushën e vet, duke mundur Flamurtarin 2-1.
Ndërsa Lushnja ka barazuar 2-2 me Turbinën. Java e 8-të mbyllet të dielën, me sfidat Burreli-Dinamo, që do të vijë drejtpërsëdrejti në rrjetin e Radio Televizionit Shqiptar, dhe Partizani B – Veleçiku.
Pa.Va/Fjala.al
