Agron Duka deklaron se Ilir Meta do ishte më mirë për opozitën të ishte kryetar i LSI, por ama është më mirë për Shqipërinë të jetë president i Republikës. Këtë deklaratë kryetari i PAA e bëri gjatë emisionit “HARD TALK NGA ROLAND QAFOKU” në FJALA TV. Sipas tij, Ilir Meta ka treguar gjatë kësaj kohe se është në shërbim të vendit dhe presidenca i vetmi institucion që nuk është i kapur nga qeveria.
-Zoti Duka, ku i shërben më mirë opozitës Ilir Meta, në LSI apo në Presidencë?
-Po të kishte qenë kryetar i LSI-së, Meta do i shërbente më shumë opozitës. Nëse e keni fjalën për gjithë vendin, për Shqipërinë, shyqyr që është në Presidencë. Sepse Rama duke kapur të gjitha llojet e pushteteve, do kapte dhe Presidencën dhe do shkonte keq e më keq kjo punë.
-Pse nuk e shkarkon Rama?
-Nuk arriti, nuk mundi ta shkarkojë sepse pa një reagim dhe nga ndërkombëtarët, edhe nga Komisioni i Venecias, por edhe sepse ndoshta shkarkimi i Metës do i jepte fund edhe atij politikisht. Kështu që unë mendoj se nëse Meta do ishte pjesë active e opozitës do ishte më mirë për opozitën, por po ta krahasosh me rolin që ka tani për ekuilibrimin aq sa mundet të pushteteve, më mirë që është në Presidencë.
