Nga Fernada Cenko
Kolegji Zgjedhor detyron Partinë Demokratike të ndryshojë listat e kandidatëve për zgjedhjet e përgjithshme që do të mbahen më 25 prill. Në vendimin që mori dje Kolegji Zgjedhor ka rrëzuar Partinë Demokratike duke i kërkuar asaj që të ketë 69 kandidatë më pak në listat për deputetë. Kolegji Zgjedhor Gjyqësor ka pranuar padinë e PS-së dhe vendimin e Kryekomisionerit Ilirjan Celibashi, që të gjitha partitë të kenë 153 emra kandidatësh për deputetë. Në total Partia Demokratike kishte depozituar një listë me 222 emra, çka e detyron atë të ndryshojë serish listat duke e çuar numrin në 153.
Përfaqësuesi i Partisë Socialiste, Eridian Salianji tha se KAS ka shkelur parimet e Kodit Zgjedhor, pasi numri i lartë i kandidatëve sjell problematika në garë dhe në procesin zgjedhor. “PD bëri korrigjimet përkatëse në lidhje me plotësimin e dokumentacionit ligjor, por paraqiti listë me 222 kandidatë. KQZ, bazuar në Kodin Zgjedhor vendosi t’i miratojë listën, por jo me 222, por me 153 kandidatë. Vendimi u ankimua në KAS, me argumentin se lista duhej pranuar e plotë. KAS duke lejuar që një koalicion të garojë me më shumë kandidatë se tjetri ka shkelur parimet e Kodit Zgjedhor. Numri i lartë sjell problematika në garë, por edhe në procesin zgjedhor”, tha Salianji. Sipas tij, numri i lartë në listë cënon parimin e listave të hapura. Kjo për shkak, sipas Salianjit, se lista pa numra fiks do sillte vështirësi në llogaritjen e herësit.
Nga ana tjetër, përfaqësuesi i KAS shprehet se do të kishim shkelje nëse nuk do ishin respektuar kuotat gjinore nëse numri i kandidatëve do të ishte më i vogël se numri i mandateve. “Do të ishim para shkeljes në listë nëse nuk do ishin respektuar kuotat gjinore, apo nëse numri i kandidatëve do të ishte më i vogël se numri i mandateve”, tha ai. Për përfaqësuesin demokrat Ivi Kaso, koalicioni i PD-së paraqiti listat referuar legjislacionit, duke respektuar të gjitha aspektet procedurale “Koalicioni i PD-së paraqiti listat referuar legjislacionit. Kemi respektuar të gjitha aspektet procedurale. Paraqitëm listë me 222 kandidatura, në përputhje me numrin minimal të parashikuar në ligj, si edhe të plotpjesëtueshëm me tre. Numrin e kandidaturave të paraqitura prej nesh nuk e shohim si problematike për fletën e votimit. Limiti i sipërm i kandidaturave është çështje vetëpërmbajtjeje dhe vetëpërgjegjshmërie”, tha Ivi Kaso.
Ky i fundit me një postim në rrjetet sociale shkruan se vendimi i Kolegjit Zgjedhor ishte i ndikuar politikisht nga nga interesi politik i partisë në pushtet. Ndër të tjera ai thotë se pavarësisht se vendimi nuk ishte në përputhje me ligjin, PD do ta respektojë atë. “Vendimi i sotëm (djeshëm) i Kolegjit Zgjedhor për listën e deputetëve nuk është vendim që respekton ligjin elektoral. Ndalimi i opozitës për t’u përfaqësuar në zgjedhje me lista të plota është i ndikuar politikisht nga interesi politik i partisë në pushtet.
Jemi të keqardhur për këtë vendim që nuk i shërben ligjit dhe interesit publik, por ne besojmë se rezultati në fund të procesit zgjedhor do të tregojë se opozita është shumica politike në vend”, tha ai. Ai ka pranuar ndryshimet duke vijuar sfidën në terren për të fituar zgjedhjet e 2021. “Pavarësisht se vendimi i Kolegjit nuk është në përputhje me ligjin, ne do ta respektojmë atë dhe do të vazhdojmë betejën tonë për fitoren e zgjedhjeve në 25 Prill, për t’u sjellë shqiptarëve ndryshmin që duan dhe meritojnë,” shkuan Kaso në postimin e tij.
