Lideri i PD, Lulzim Basha ka reaguar përmes një statusi në “Facebook” mbi ngjarjen që ndodhi në Qytet Studenti. Ai pati një diskutim me sportelisten e cila nuk e lejoi të futej në godinat e konvikteve. Kjo e fundit tha se kishte urdhra nga lart për të mos e lejuar kreun e PD-së të futej në ambientet e brendshme.
Ditën e djeshme Basha mori një denoncim nga Bashkia e Tiranës, pasi ai hyri në godinën numër 4. Arsyeja e denoncimit të lëshuar ishte se ai nuk kishte marrë leje për të hyrë në konvikt.
Por sipas Bashës ky denoncim nuk do e ndalojë atë që të vazhdojë të dëgjojë problemet e qytetarëve dhe të shërbejë si ndihmues publik.
Reagimi i plotë i Bashës:
Ngjarjet e 24 orëve të kaluara janë një pamje e qartë e realitetit me të cilin përballet Shqipëria.
Mbrëmë ishim të ftuar nga disa studentë për të parë si jetojnë dhe për të dëgjuar shqetësimet e tyre. Studentët tanë janë e ardhmja e këtij kombi, shqetësimet e tyre janë shqetësimet tona. Kjo është rruga jonë. Rruga e të dëgjuarit, e përfaqësimit të vërtetë të të gjithë shqiptarëve.
Kur mbërritëm në godinë u takuam me një punonjëse të konviktit, e cila na kërkoi të largoheshim. Kjo porosi erdhi nga lart.
Në fakt kjo është rruga tjetër, ajo e frikësimit dhe intimidimit.
Si shërbyes publik, nuk do të lejoj askënd që të më pengojë të dëgjoj problemet e bashkëqyetarëve të mi dhe të përpiqem t’i ndihmoj ata. Kjo është arsyeja pse u bëra pjesë e jetës publike.
Unë u bëj thirrje atyre që merren me kërcënime dhe frikësime, të rishqyrtojnë taktikat e tyre. Populli shqiptar do të dëgjohet!
