Të paktën 13 persona kanë vdekur dhe dhjetëra të tjerë janë plagosur pasi një vullkan shpërtheu në ishullin Java të Indonezisë të shtunën. BBC shkruan se banorët u filmuan duke ikur nga një re gjigante hiri nga mali Semeru.
Videoja tregon fshatra të tëra të varrosura në hirin vullkanik deri në çati, dhe vendasit kanë përshkruar tymin e dendur që bllokon Diellin, duke i lënë ata në errësirë.
Zyrtarët thanë se të paktën 57 persona janë plagosur, shumë prej të cilëve kanë pësuar djegie të rënda. Një zëdhënës i agjencisë indoneziane për zbutjen e fatkeqësive (BNPB) tha se të lënduarit po trajtoheshin në spitale dhe objekte të ndryshme mjekësore.
Shpërthimi ka lënë të paktën 11 fshatra në rrethin Lumajang të mbuluara me hi vullkanik, duke zhytur shtëpi dhe duke detyruar disa të evakuuar të kërkojnë strehim në xhami dhe strehimore të improvizuara. Sipas zyrtarëve të BNPB, 902 persona janë evakuuar nga zona deri më tani.
