Pas takimit në Londër të 6 ministrave të Jashtëm të Ballkanit perëndimor, sekretarja e jashtme Elizabeth Truss ka dhënë alarmin për situatën kritike që mbizotëron në rajon, sidomos në Bosnjë e Hercegovinë. “Bosnja dhe Hercegovina aktualisht po përballet me rrezikun më të madh të ekzistencës së saj, që nga paslufta. Po ashtu, ka rrezik të madh të thellimit të ndarjeve dhe konfliktit”- tha Truss.
Gjithashtu gjatë takimit i është kërkuar Kosovës dhe Serbisë që të angazhohen në dialog dhe të bëjnë përparim në këtë proces pa vonesa. Nga ana tjetër ministrja për Evropën dhe Punët e Jashtme, Olta Xhaçka, u shpreh se mbështetja e aleatëve të BP vjen si një sinjal mbështetjeje të vazhduar për rajonin dhe si një garanci që rajoni do të vazhdojë të avancojë në rrugën e integrimit Euro-Atlantik.
“Lajmi i mirë nga të gjithë takimet sot me Mbretërinë e Bashkuar, por edhe me SHBA dhe BE, është vendosmëria e tyre për të hapur një kapitull të ri të angazhimit ekonomik me rajonin tonë, duke e parë gjithnjë e më shumë atë si një hapësirë të vetme ekonomike dhe zhvillimore. Një hapësirë gjithëpërfshirëse, siç është ajo që parashikon nisma Ballkani i Hapur, që gëzon mbështetje ndërkombëtare dhe që në gjykimin tonë duhet të jetë gjithëpërfshirëse. Që do të thotë që ne duam që pjesë e saj të bëhen edhe Kosova, Bosnja dhe Hercegovina dhe Mali i Zi. Kjo nuk do të thotë se ne mund t’i detyrojmë fqinjët tanë të bashkohen kundër vullnetit të tyre në atë që në këtë fazë është e qartë se është ende në progres. Por kjo do të thotë se ne do të punojmë pa u lodhur për të shpjeguar nismën dhe që të 6 vendet e Ballkanit Perëndimor t’i bashkohen kësaj hapësire të vetme, duke u përgatitur kështu për integrim në BE”, tha ministrja pas takimeve në kryeqytetin britanik.
Takimi i kryediplomatëve të rajonit në Londër, vjen një ditë pas takimit të Ministrave të Jashtëm të G7, i cili u mbajt në Liverpul.
