Kryeministri Edi Rama thotë se nuk e njihte Ardian Çapjan, pronarin e hotelit “Univers” në Elbasan, sot subjekt i hetimit të pasurive nga OFL.
Rama tha se në atë kohë, shkoi në hotelin në pronësi të Çapjas për shkak se ishte periudhë fushate, dhe hoteli disponon sallë konferencash. Aty i kërkuan të bëjë edhe foto me personin në fjalë, për të cilin Rama tha se nuk ishte i informuar. Sipas gazetarit Artan Hoxha, foto është realizuar në vitin 2015.
Pjesë nga debati me gazetaren Klodiana Lala në “Opinion”:
Edi Rama: Ky është holli një hoteli ku unë kam qenë duke hyrë apo duke dalë. Më kanë ardhur këta persona dhe më tha a mund të bëjmë një foto. Kam dhe disa foto, sepse në ato dy tre herë që kam qenë atje kam qenë për vente. Në atë hotel ka një sallë konference, kemi bërë një foto dhe çfarë tregon kjo?
Klodiana Lala: A ishit ju i informuar që kjo pronë, është e një personi që ka urdhëruar vrasje?
Edi Rama: Jo, jo jo … Nuk isha i informuar dhe nuk kam asnjë problem me këtë foto. Ka dhe një foto tjetër që e kanë vënë në mur ata.
Klodiana Lala: A u shqetësuat kur e patë këtë foto?
Edi Rama: Punët e policisë janë të policisë, punët e mia janë të miat…
Klodiana Lala: Ajo vajza me syze e OFl-së i ka vajtur atje…
Edi Rama: Mos i hy fare se qenke komplet tap topi ndaj kësaj fushe…
Klodiana Lala: mos më intimido zoti Kryeministër. Kam bërë shkollë për këtë punë…
Edi Rama: U qava nga Mark Marku, po kjo qenka…. çështja kjo mo?
Klodiana Lala: Zoti kryeministër do japësh përgjigje…
Edi Rama: Do jap përgjigje por ti duhet ta qepësh!
Bledni Fevziu: O Klodi, por të fut në kurth. Mos e merr personale
Edi Rama: OFl nuk e coj unë, e çon ligji. Dhe ky është subjekt i tij. Nuk kam asnjë pishman, e bëj edhe njëqind herë të tjera.
Ardian Capja sipas Operacionit Forca e Ligjit është i dyshuar për një sere vrasjesh në qytetin e Elbasanit për motive hakmarrjeje ndërsa në qershor të vitit 2016 qëlloi ndaj Policisë. Sipas Policisë, Çapja së bashku me të afërm të tij ka kryer dhe vrasje me pagesë përgjatë viteve 2009-2016.
