Lëvizja Socialiste nuk ka dal përtej pritshmërive dhe i ka dhënë mbështetje ish-kryetarit të saj Ilir Meta, aktualisht President i Republikës, për protestën e 2 marsit. Nënkryetari i LSI-së, Petrit Vasili la të kuptohet se do i bashkohen protestës së Presidentit dhe të njëjtin veprim, sipas tij, duhet ta bëjë çdo qytetar i shqetësuar për kapjen e shtetit duhet të dalë më 2 mars në bulevard.
“Çështja për të cilën Presidenti thërret qytetarët ka të bëj me një “puç kushtetues”. Kështu që të gjithë qytetarët në shesh i bashkon nevoja për të pasur një shtet demokratik. Çdo qytetar që do republikën duhet të jetë në shesh. Nuk shtrohet problemi duhet të jetë opozita apo maxhoranca. Kur një shtet kapet, i gjithë sistemi bie, nuk është i rënë vetëm për opozitën por për të gjithë qytetarët. Ky është mitingu i qytetarëve që kërkojnë një republikë të drejt. Nuk duhet një republikë që ka rënë, ku rrëmbehen të gjitha pushtetet. Reforma në Drejtësi është një dështim i plotë në të gjitha pikëpamjet. Është një republikë që funksionon nga zyra e kryeministrit. Secili ka vendin e tij dhe patjetër të gjithë duhet të jenë atje. Kur republika bie janë të gjithë të shqetësuar. Unë po them do të jenë të gjithë shqiptarët, jo opozita. Rënia e republikës është problem i gjithë shqiptarëve”, tha Vasili në studion e Rtv Ora.
