Lufta në Ukrainë por edhe thatësirat përreth botës si asnjëherë më parë, kanë bërë që shumë vende të globit, sidomos në Europë, të ndodhen përballë një krize energjitike. Kjo do të thotë se masa kundër krizës duhet marrë, përfshirë këtu edhe kursimin e energjisë elektrike, për të shmangur në muajt e ardhshëm kufizimet e mundshme.
Ditën e sotme zëvendëskryeministrja dhe njëherazi ministrja e Infrastrukturës dhe Energjisë, Belinda Balluku, ka dhënë një mesazh për qytetarët, duke i kërkuar pikërisht që ta kursejnë energjinë sa të munden dhe të mos e përdorin kur nuk është e nevojshme.
Ajo apelon që qytetarët të sigurohen kur dalin nga banesa që të gjitha dritat të jenë të fikura dhe të shmangin ndriçimin e panevojshëm, gjatë kohës që ndodhen në shtëpi.
