Komuniteti i Verisë ka “ngrirë” nga lajmi se një nënë 29-vjeçare hodhi në digën e Aliakmonasit foshnjën e saj, një vajzë të vogël vetëm 11 muajshe. Sipas informacioneve të mediave vendase, në natën e ndërrimit të viteve, 29-vjeçarja është larguar nga fshati Stavros Imathia, ku jetonte me prindërit e saj, me vogëlushen. Gruaja dyshohet se shkoi në digën e Aliakmonas dhe e braktisi fëmijën në ujërat e akullta. Menjëherë më pas është nisur për në Aleksandri dhe ka qëndruar në një hotel, ku ka kaluar natën e ndërrimit të viteve.
Të nesërmen, ditën e Vitit të Ri, ajo u kthye në shtëpi pa fëmijën. E pyetur nga prindërit për vendndodhjen e fëmijës, ajo nuk ka dhënë përgjigje të qarta. Menjëherë është njoftuar Policia dhe kanë nisur hetimet për të zbardhur saktësisht se çfarë ka ndodhur.
Gruaja fillimisht kundërshtoi veten, duke pretenduar se e kishte lënë në një vend tjetër foshnjën, por pas presionit të Policisë, ajo ka rrëfyer se e ka hedhur në Aliakmonas. Më në fund, foshnja u lokalizua nga efektivët dhe Policia arrestoi nënën, e cila mësohet se vuante nga probleme psikologjike pasi ishte shtruar në klinikat psikiatrike në të kaluarën.
Çfarë thotë kryetari i bashkisë?
Sipas asaj që raportoi për Newsbomb.gr, kryetari i bashkësisë lokale të fshatit, Yannis Keisidis tha se askush nuk e priste që diçka e tillë të ndodhte.
“E njoh shumë mirë E. Ne ishim fqinjë. Ajo ishte një nënë e përsosur. Ne e dinim që ajo po përballej me probleme psikologjike , por me ndihmën e nënës dhe gjyshit, pasi i kishte vdekur babai, ajo po e rritte mirë foshnjën”, tha Keisidis.
Rrëfimi i nënës në polici
“Askush nuk e do fëmijën tim, as prindërit e mi nuk e donin atë,”- dyshohet se kanë qenë fjalët e para të 29-vjeçares, sipas informacioneve të Newsbomb. Në fillim ajo tha gjëra që nuk kishin kuptim dhe tha se e kishte lënë në një shtëpi të braktisur në Veri, por më pas u tha oficerëve se doli për shëtitje me foshnjën në lumë, duke treguar dhe vendin.
Babai i foshnjës ka folur për Newsbomb.gr se si mësoi vdekjen e fëmijës së tij dhe çfarë marrëdhëniesh kishte me nënën.
“E mora vesh dje nga Policia,”- tha ai dhe përmendi se deri më tani nuk ka pasur asnjë komunikim me familjen e 29-vjeçares. Sipas tij, ai po përpiqej të mbante lidhje me fëmijën. Ai kishte shkuar me 29-vjeçaren te pediatri më 2 dhjetor, ndërsa e kishte parë edhe në prag të Krishtlindjes kur kishte vizituar shtëpinë e të resë. Atë ditë, sipas tij, foshnja po luante në kuzhinë.
Sa i përket varrimit të foshnjës, ai tha se ende nuk e dinë se kur do të bëhet.
29-vjeçarja u largua nga shtëpia e saj në natën e Vitit të Ri, duke u thënë prindërve të saj: Unë do të bëj një festë për ngrohjen e shtëpisë. Kur ajo u kthye në mëngjesin e Vitit të Ri, prindërit e saj e kuptuan se ajo nuk e kishte fëmijën me vete dhe menjëherë u shqetësuan dhe njoftuan Policinë. Ndërsa në shtëpi është kthyer në shtëpi me taksi. Taksisti që e mori raportoi se ajo ishte në një gjendje të qetë shpirtërore dhe nuk dyshonte për ndonjë gjë të pazakontë.
Sipas informacioneve, nëna vuan nga probleme të rënda psikologjike dhe ishte shtruar shumë herë (rreth 10) në të kaluarën në një klinikë psikiatrike. Të njëjtat burime bëjnë me dije se asaj i ishin dhënë mjekime, të cilat së fundi i kishte ndërprerë.
