Kryetari i Partisë Demokratike Sali Berisha në një dalje publike dje e ka konsideruar si sukses protestën e së shtunës së kaluar dhe qëllimi sipas tij ishte “ndërgjegjësimi ndërkombëtar” për “nisjen e revolucionit demokratik paqësor”.
Rama gjen “qetësinë” dhe ironizon tubimin e demokratëve.
Kryetari i PD-së Sali Berisha ka komentuar protestën një ditë pas zhvillimit të saj, duke e cilësuar si “nisjen e revolucionit demokratik”. Kreu i PD-së është vendosur nën trysni, pasi pritshmëritë e demokratëve ishin më të mëdha, për një protestë të qëndrueshme që mund të lëkundnin pozitat e Ramës.
Për të mbrojtur protestën e cila ishte relativisht e madhe, por mjaft paqësore dhe me “kauzë” të mbetur në mes, Berisha u shpreh se protesta ia arriti qëllimit, që sipas tij ishte ndërgjegjësimi I faktorit ndërkombëtar dhe për më tepër e cilësoi vetëm si nisjen e një revolucioni demokratik, që sipas tij do të mbyllet me largimin e Ramës. “Hapja dje (të shtunën), e revolucionit tonë me një protest madhështore ka pushtuar mediat e botës. Protestën tonë e përcollën gjerësisht të gjitha agjencitë e mëdha të botës. ne treguam se ka një popull që nuk pajtohet me aktet kriminale të Edi Ramës.
Ai rekruton kryezbuluesin e SHBA-ve për të luftuar opozitën”-tha Berisha. Më tej asi shtoi se protesta ishte sipari i një revolucioni paqësor e demokratik. “Ata të cilët para protestës u zhdukën si minjtë nga frika e tmerri, kur e panë se u larguam të qetë dhe panë njëri-tjetrin se nuk u ndodhi gjë dolën nga ishin futur dhe filluan të thonë ku është revolucioni. Ja ku është qeveria”, theksoi kreu I PD-së. megjithatë Berisha premtoi se protesta e sotme përpara Parlamentit do të jetë më e vendosur.
“Parlamenti do ketë protestat më të fuqishme popullore rreth tij. Zgjedhësit e Tiranës dhe Shqipërisë do protestojnë për një parlament që respekton votën e 620 mijë shqiptarëve që kanë votuar kundër Edi Ramës. Ndaj dhe demokratët e Tiranës janë të ftuar dhe kërkoj që të bëjnë çdo përpjekje për të qenë te parlamenti në çdo seancë. Ai është institucioni i krimit monstruoz kushtetues, çdo seancë shkelmohet kushtetuta e vendit”-tha Berisha.
Rama ironizon protestën
Edi Rama ka publikuar video nga protesta e thirrur nga Sali Berisha në kryeministri, ku u hodhën tymuese e shashka dhe ironizon duke thënë se ditën e shtunë ishin zhgarravinat e revolucionit ndërsa sot nis një javë punësh të mira.
Me fjalët që u përdorën më shpesh gjatë protestës nga Sali Berisha si “revolucion demokratik” dhe “rrëzim regjimi”, kreu i qeverisë ka ironizuar protestën që u mbajt para kryeministrisë, ku protestuesit hodhën edhe shashka e tymuese. Përmes një postimi në Twitter, kryeministri Edi Rama shkruan: “Dje zhgarravinat e revolucionit, sot (dje) dushi i regjimit, nesër (sot) nis një javë e re punësh të mira”.
Në pamje shfaqet momenti i hedhjes së shashkave dhe më pas pastrimi i ambienteve të jashtme të Kryeministrisë që Rama e quajti “dushi i regjimit”. Kreu i qeverisë është kujdesur edhe për audion pasi fillimisht dëgjohet zëri i Sali Berishës që e cilëson opozitën më të fuqishme se kurrë dhe më pas shfaqet kënga për fëmijë “Macja le të lahet”. Kështu e ironizon gjithçka organizoi ish kryeministri një ditë më parë në bulevardin “Dëshmorët e Kombit”, ku theksonte se ishte nisja e një revolucioni demokratik për rrëzimin e Edi Ramës dhe qeverisë së tij.
