Ministri Italian i Sportit, Vinçenzo Spadafora ka dalë ditën e sotme në një deklaratë për mediat,ku e ka quajtur të papërgjegjshme Serinë A që vendosi të rifillojë ndeshjet, ndërkohë që vendi është në gjendje alarmi nga koronavirusi.
Ai ka akuzuar Ligën më të madh e të futbollit italian dhe presidentin e saj, Dal Pino dhe ka shtuar se nëse ky kampionat nuk merr përgjegjësitë e veta, atëherë Ministria do ndërhyjë.
“Bota e futbollit dhe veçanërisht ajo e Serisë A ndihet e paprekshme nga virusi, a thua se duhet të vazhdojnë me patjetër pavarësisht çdo lloj kostoje. E di shumë mirë se ndeshjet janë një mundësi e mirë për tifozët, por situata këtu po zhvillohet orë pas ore. Kam marrë shumë mesazhe fyese dhe kërcënuese, gjithsesi mua më intereson vetëm shëndeti publik.
Liga nuk merr përgjegjësitë e saj. Presidenti Dal Pino gjithmonë i shmanget përgjegjësive. Mendoj se ky menaxhim nuk është në dijeni të seriozitetit të situatës. Mos po presin rastet e para dhe në Serinë A? Çfarë duhet t’i ndodhë më tepër vendit?
Nëse do na duhet të veprojmë sepse Liga dhe Federata nuk veprojnë, atëherë do ta bëjmë në orët në vazhdim. Do të presim deri të martën. Kam besim te Presidenti (i Federatës Italiane) Gravina,”-tha ai.
Kjo thirrje vjen në një kohë kur në Itali numri i viktimave nga koronavirusi ka arritur në 366, ndërsa numri i të prekurve mbi 6387./Fjala.al/
