Operatorët turistikë: Prenotimet për këtë periudhë kanë nisur që në muajin Korrik
Qytetarë të shumtë zgjodhën që ta kremtonin Krishtlindjen në Korçë. Janë jo vetëm të ardhur nga qytetë të ndryshme të vendit, por edhe nga Greqia. Kremtojnë këtë festë pranë familjes dhe të tjerë shijojnë atmosferën e veçantë të qytetit.
“Na kanë ardhur nipa, mbesa. Mezi presin të kemi këto festa të gëzuara.”
“Tentojmë të vijmë njëher në vit, njëherë në dy vjet.”
“Shumë bukur! Kemi jetuar edhe më para këtu në Korçë kam qenë student. Kemi nostalgji.”
Kapacitetet akomoduese në qytet janë të gjitha të rezervuara për këtë periudhë. Sipas operatorëve turistikë prenotimet kanë nisur që në muajin Korrik.
“Shumica e vizitorëve janë vendas në fakt. Janë nga rrethe të ndryshme përveç Korçës, por ka edhe emigrantë që janë nga Korça, por jetojnë jashtë në Amerikë apo në Greqi dhe në vende të ndryshme të Europës.”
Rezervime nuk ka vetëm për netët e festave.
“Nuk janë të rezervuara vetëm datat e Krishtlindjeve dhe Vitit të Ri, por janë edhe datat midis tyre. Ka njerëz që e zgjedhin Korçën si një opzion për të kalura pushimet e tyre dimërore.”
Veç qytetit turistët vizitojnë edhe destinacionet e dimrit, Dardhën dhe Voskopojën./O.S
