“Në Ditën Botërore të Ndërgjegjësimit për Autizmin, i bashkohem fushatës globale “Ndriço Blu”
Ky është mesazhi që jep presidenti Ilir Meta teksa publikon pamjet e ndezjes së dritave blu në Presidencë. I gjithë institucioni i kreut të shtetit është ndriçuar në blu dhe kjo për të respektuar Ditën Botërore të Ndërgjegjësimit për Autizmin.
“Dita Botërore e Ndërgjegjësimit për Autizmin, na kujton detyrimet institucionale dhe shoqërore, për fëmijët dhe familjet e tyre, të cilët kanë nevojë për solidaritet, ndihmë, përkujdesje dhe dashuri të përhershme.
Sot kjo Ditë shënohet në mes të një krize të rëndë shëndetësore dhe ekonomike, për shkak të pandemisë globale COVID-19, që ka sjellë vështirësi të mëdha, veçanërisht për fëmijët me autizëm, të cilët nuk mund të zhvillojnë veprimtaritë dhe aktivitetet aq të domosdoshme për zhvillimin e aftësive të tyre. Mbështetja dhe përkrahja e këtyre fëmijëve, si dhe zgjidhja e problemeve thelbësore që shqetësojnë familjet e tyre, duhet të jetë përparësi.
Shoqëria jonë ka nevojë për solidaritet, për një Shqipëri të dhembshur dhe humane, për dashurinë, kujdesin dhe përkushtimin ndaj njerëzve më në nevojë”, shkruan Presidenti.
