Malet kanë ngelur pa dëborë, bizneset në malin Terminillo janë mbyllur
Ky vendpushim në Italinë qendrore është pothuajse i zbrazët nga turistët për shkak se male të tëra këtë dimër kanë mbetur pa dëborë. Mali Terminillo, i cili ngrihet 2217 metra i lartë në Apenine dhe është normalisht një destinacion i preferuar për të pasionuarit pas sporteve dimërore këtë vit ka mbetur i shkretë. Restorantet dhe baret janë pothuajse të gjitha të mbyllura dhe askush nuk vjen për të marrë pajisje me qira për të bërë ski. Pronarët e bizneseve fajësojnë ndryshimet klimatike për këtë situatë.
“Jemi në vitin e dytë të përvojës në menaxhimin e objekteve të skive. Vitin e kaluar, në përgjithësi, sezoni shkoi mirë. Fatkeqësisht, kushtet klimaterike nuk po e favorizojnë biznesin tonë këtë vit”, thotë një prej tyre.
Jo vetëm që nuk ka rënë kurrë borë, por temperaturat e larta madje e kanë bërë të pamundur prodhimin e borës artificiale.
“Nuk kemi pasur kurrë një sezon të tillë, është e vështirë. Ne e hapim dyqanin në mëngjes dhe e mbyllim në mbrëmje dhe për sa kohë do të vazhdojë kjo nuk e dimë, por gjithsesi shpresojmë për më të mirën”, shton një tjetër.
Italia do të përdorë Lojërat Olimpike Dimërore në 2026 për të promovuar destinacionet e saj më të bukura dimërore, por me rënien e reshjeve të borës, një numër në rritje i resorteve po shqyrtojnë burime alternative të të ardhurave.
Rreth Terminillos, i cili normalisht ofron më shumë se 9 kilometra për t’u marrë me sporte dimërore vendasit kanë frikë se panorama e shpateve të mbushura me dëborë do të jenë thjesht dhe vetëm një kujtim i së shkuarës./O.S
