Gjatë kësaj fundjave e gjithë Tirana pritet të ketë kufizime në furnizimin me ujë.Ky lajm është bërë publik nga zv.drejtoresha e përgjithshme e UKT-së, Evis Gjebrea gjatë një interviste në Report TV.
Gjebrea ka bërë me dije se do të nisin punimet për lidhjen e linjës së transmetimit të Ujëmbledhësit të Bovillës me Impiantin e trajtimit të ujit në Bovillë dhe kjo do shkaktoj ndërprerjen e ujit.
“Kjo është një linjë, e cila do të transmetojë dyfishin e kapacitetit që transmetohet aktualisht deri në impiantin e përpunimit të Bovillës. Në impiant aktualisht prodhohet 1800 litra për sekond ujë dhe me këtë shtesë të kapacitetit do të shkojmë në 2400 litra/sec. Do të jetë e gjithë Tirana e cila do të ketë kufizime të furnizimit me ujë. Ne kërkojmë mirëkuptimin e qytetarëve pasi punimet do të fillojnë herët në mëngjes ditën e shtunë dhe pritet që të vazhdojnë edhe ditën e diel. Të marrin masa për të depozituar, për të pasur depozitat e mjaftueshme gjatë këtyre dy ditëve që do të kryhen punimet”- u shpreh Evis Gjebrea.
Më tej ajo tregoi se janë marrë masat për të siguruar furnizim të qëndrueshëm, gjatë fundjavës, për institucione të rëndësisë së veçantë.
“Ujësjellësi i Tiranës ka marrë të gjitha masat e nevojshme për të siguruar furnizim të qëndrueshëm, gjatë fundjavës, për institucione të rëndësisë së veçantë si spitalet, urgjenca mjekësore, burgjet etj”-tha zv.drejtoresha e përgjithshme e UKT.
Këto punime do të nisin që në orët e para të ditës së shtunë, ndaj të gjithë qytetarët duhet të jenë të përgatitur.k.t/Fjala.al/
