Këshilli i Kooperimit Rajonal, 19% e qytetarëve nuk sigurojnë dot furnizimet jetike. Studimi për vendet e rajonit
Nga Ornela Bereti
Të jetosh në Shqipëri në kushte minimale, të kesh një stres, të paguash ujin e dritat dhe të ushqehesh, është e pamundur për një pjesë të konsiderueshme të popullatës. Rreth 26% e shqiptarëve nuk arrijnë të paguajnë qiranë, ujin e dritat, ndërsa 19% e të anketuarve nuk e sigurojnë dot ushqimin. Të dhënat janë publikuar në një anketë të Këshillit të Kooperimit Rajonal, e cila i nxori shqiptarët si popullin me pamundësitë më të mëdha për të paguar faturat mujore e për të siguruar ushqimet e nevojshme ndër 5 vende të tjera të rajonit, si Serbia, Bosnja, Kosova, Maqedonia dhe Mali i Zi. Anketa gjeti se 26 për qind e qytetarëve në vitin 2019 nuk kishin mundësi të paguanin faturat e dritave dhe të ujit. Kjo ishte përqindja më e madhe në rajon, ku vetëm 10% e boshnjakeve kanë pohuar vështirësi në pagesën e tyre, 19 për qind e qytetarëve nga Kosova, 20 % e maqedonasve, 19% e qytetarëve të Malit të Zi dhe 17 për qind e serbëve. Shqiptarët gjithashtu kishin përqindjen më të lartë në rajon për pamundësinë për të siguruar ushqimet dhe veshjet e nevojshme për familjen. 19% e qytetarëve të vendit tonë pohuan se nuk kishin mundësi t’i siguronin këto furnizime jetike. Në Bosnjë vetëm 7% e qytetarëve nuk kishin mundësi të siguronin ushqime dhe rroba, 12% e shtetasve nga Kosova, 11% e maqedonasve, 13% e malazezëve dhe 10% e serbëve nuk kishin mundësi të siguronin ushqime dhe rroba për familjen.
Borxhet
Shqiptarët ishin me përqindjen e më të lartë të pamundësisë për të paguar huatë, ku 16 për qind e të pyeturve kanë pohuar se nuk kanë pasur mundësi të kryejnë pagesën, në raport me 9 për qind të boshnjakëve, 14 për qind e shtetasve nga Kosova, 13 për qind e maqedonasve, 14 për qind e malazezëve dhe 7 për qind të serbëve. Mungesa e standardeve të banesave, ngrohja e shtrenjtë me energji dhe të ardhurat e ulëta privojnë gati gjysmën e shqiptarëve nga aksesi në ngrohjen e banesave. Anketa e Barometrit të Ballkanit gjeti se në vitin 2019, gati gjysma e shqiptarëve, 42 për qind e tyre, nuk kishin mundësi të siguronin ngrohje për banesën, ndryshe nga vendet e tjera ta rajonit ku kjo përqindje ishte shumë e vogël. Vetëm 9% e boshnjakëve nuk kishin mundësi të siguronin ngrohje për banesën 11% e shtetasve nga Kosova, 16% e maqedonasve, 17% e malazezëve dhe 11% e serbëve.
Pushime
Pyetjes “A jeni ndeshur me paaftësi për të përballuar të paktën një javë pushime larg nga shtëpia (nëse doni) gjatë 12 muajve të kaluar”, rreth 645 e shqiptarëve i janë përgjigjur po, që sërish është përqindja më e lartë në rajon. Në përgjithësi, për këtë pyetje, të gjitha vendet e rajonit kanë shprehur pamundësinë për të bërë pushime, ku pas Shqipërisë renditet Mali i Zi (48%), Maqedonia e Veriut (46%), Serbia (40%), Bosnjë-Hercegovina (35%). Në rajon, më lehtë i përballojnë pushimet shtetasit nga Kosova, me vetëm 28% të totalit, që pohojnë që nuk bëjnë dot pushime. Kosova ka si destinacion kryesor për të kaluar pushime Shqipërinë. Barometri i Ballkanit, një publikim i Këshillit për Bashkëpunim Rajonal, bën të ditur se pjesa më e madhe e vendeve të rajonit kanë shënuar një rritje të numrit të atyre që shprehen të kënaqur, një tregues i fortë se efektet e rritjes në ekonomi po përkthehen në përfitim edhe për qytetarët, por e kundërta ka ndodhur me vendin tonë. “Shqipëria është liderja rajonale në përqindje të atyre që janë të palumtur, plot 42 për qind e popullatës, teksa në Kosovë, më pak se një çerek apo 23 për qind e të anketuarve janë të pakënaqur, duke e kthyer këtë në rajonin më të kënaqur ekonomikisht”, thuhet në publikim. Për sa i takon situatës financiare në 12 muajt në vazhdim,18 për qind e shqiptarëve presin të jetë më keq, ndërsa 54 për qind nuk presin asnjë ndryshim. Më mirë e presin 25 për qind e të anketuarve. Duke renditur problematikat që shqetësojnë vendet nga papunësia te korrupsioni, mbrojtja e natyrës dhe e trashëgimisë, Barometri i Ballkanit tregon se papunësia, zhvillimi ekonomik mbajnë rekordin e shqetësimeve në rajon. Korrupsioni ndërkohë renditet i treti, por prevalenca e tij në rajon po rritet dhe në anketën e fundit me 31 për qind, në raport me atë të vitit 2018. Barometri tregon se të paktën për Shqipërinë ka ndryshuar disi stereotipi për sa i takon frikës. Në një prej pyetjeve të anketës, e cila specifikon se kur mendoni për Ballkanin Perëndimor, çfarë ndjenje ju vjen në mendje, vetëm 5 për qind e të anketuarve janë përgjigjur me “frikë”.
/En.Br./Fjala.al
