Në rolin e pritësit kryeministri Edi Rama i ka ftuar bashkëdiskutuesit e Mini-Shengenit të vizitojnë Durrësin e prekur nga tërmeti i 26 nëntori.
Edhe pse ditën e djeshme ardhja e tyre në Tiranë u prit me protesta, kryesisht nga aktivistë të Vetëvendosjes, ditën e sotme pritet që pas vizitave në disa objekte të rrënuara në zonën bregdetare liderat e katër vendeve të Ballkanit të hyjnë në takimin e radhës.
Këtë takim siç edhe e lançuam më herët e braktisi Kosova dhe Bosnja për shkak të pranisë së palës serbe kryesisht.
Zërat pranë qeverisë kanë bërë të ditur se liderët e rajonit kanë vizituar sot zonat e prekura nga tërmeti në Durrës, të shoqëruar nga kryeministri Edi Rama. Presidenti i Serbisë, Aleksandër Vuçiç, Presidenti i Malit të Zi, Milo Gjykanoviç dhe Kryeministri i Maqedonisë së Veriut, Zoran Zaev, kanë parë nga afër rrënojat dhe kanë dëgjuar shpjegimet nga Rama për planin e rindërtimit nga ana e qeverisë për strehimin e mijërave të prekurve.
Tre liderët e rajonit ndodhen në Shqipëri për takimin e tretë të “mini-Shengenit”, hedhjen e hapave të një marrëveshjeje rajonale për lëvizjen e lirë të njerëzve dhe mallrave. Presidenti serb Vuçiç u prit me protesta në Tiranë ditën e mbërritjes.
Vizita e liderëve rajonalë pason solidarizimin që fqinjët e Shqipërisë shprehën menjëherë pas fatkeqësisë së tërmetit. Ekipet e emergjencave nga këto vende, veçanërisht nga Serbia, punuan krah për krah me shqiptarët e kosovarët për shpëtimin e të mbijetuarve nga rrënojat dhe nxjerrjen e kufomave.
Grupi mbërriti edhe në kompleksin e pallateve “Jedas” në Durrës panë nga afër dëmet në kompleksin që ka 185 apartamente dhe që është shpallur i pabanueshëm nga tërmeti i 26 nëntorit.
E gjithë zona përreth është rrethuar nga forca të shumta policore. Zaev, Gjukanoviç dhe Vuçiç ndodhen në Shqipëri për të marrë pjesë në takimin e radhës së “Shengenit Ballkanik”. /Fjala.al/
