Gjeneral Qassim Soleimani, një prej liderëve kryesorë të ushtrisë së Iranit, u vra në një sulm ajror amerikan në aeroportin ndërkombëtar të Bagdadit këtë të premte. Ky atentat shënon një përshkallëzim të madh në tensionet SHBA-Iran.
Nis kështu shkrimin e saj prestigjiozja, The Telegraph, duke lënë të nënkuptohet se jemi në prag të një lufte të mundshme mes SHBA-së dhe Lindjes së Mesme.
Ka qenë vetë presidenti Donald Trump që ka urdhëruar vrasjen e Soleimani, ndërkohë që në profilin në “Twitter” ka publikuar një foto të flamurit amerikan.
— Donald J. Trump (@realDonaldTrump) January 3, 2020
Gjenerali Qassem Soleimani ishte Komandanti i Forcës elitë Al-Quds, pjesë e Ushtrisë së Gardës Revolucionare të Iranit. Vrasja e tij nga shumë ekspertë po konsiderohet si momenti më delikat në Lindjen e Mesme që pas Luftës së Irakut.
Përgjigja e Uashingtonit erdhi pas sulmeve të bëra ditët e fundit ndaj Ambasadës Amerikane në Baghdad, të cilat mendohet se janë nxitur nga forcat iraniane.
Vrasja e Soleimani rrezikon të ketë pasoja të thella në marrëdhëniet e tensionuara midis Uashingtonit dhe Teheranit, në Lindjen e Mesme por edhe në Shtetet e Bashkuara.
Irani zyrtar tha se SHBA dhe Izraeli ishin përgjegjës për aktin e asaj që ata e quajtën terrorizëm ndërkombëtar dhe premtuan reagime, ndërsa tregjet e naftës në Lindjen e Mesme kanë shënuar rritje të mprehta të çmimit të naftës./Fjala.al
