Skuadrat më të mira të vendosur përballë njëra-tjetrës, për titullin e Ligës së Kampionëve ose njohur botërisht si Champions League rikthehet mbrëmjen e sotme në raundin e 1/16-ave.
Dy super ndeshje do të startojnë këtë fazë mbrëmjen e sotme ku kryesuesit e Premier Ligës, Liverpool do të ndeshet me skuadrën e Atletico Madrid, në një sfidë që pritet të jetë e mbushur plot aksion.
“Reds” të trajnerit Jurgen Klopp do të tentojnë fitoren e radhës pas dominimit total të kampionatit më të madh të futbollit anglez. Ndërsa klubi spanjoll vjen plot energji pas finales së Superkupës së Spanjës dhe asaj të Kupës së Mbretit, ndonëse në të dyja arriti të merrte vendin e dytë.
Trajneri i Liverpool në këtë sfidë, cilësuar si finalja e parakohshme, i ka besuar gjithçka treshes Firmino-Slaha-Mane.
Ndërsa Diego Simone, kreu i skuadrës së Atletico Madrid do ketë disa mungesa në takimin e parë të kësaj faze të Championsit, pasi Herrera, Joao Felix dhe Tripper janë të dëmtuar. Kjo është hera e parë që Simone përballet me një trajner si Jurgen Klopp dhe kjo në njëfarë mënyre është edhe një sfidë për vet atë.
Ndonëse Liverpool duket si favorit i kësaj përballjeje, surprizat janë një nga detajet më të veçanta të Championsit.
Takimi tjetër që do të luhet po në orën 21:00 mbrëmjen e sotme është ai midis Dortmundit që renditet i 3-i në kampionatin e futbollit gjerman dhe Paris Saint-German që ka sunduar sezonin 2019-2020 në Ligue1.
Gjermanët vijnë në këtë sfidë me emra dhe talente të reja siç është Haland, por edhe huazimi tjetër Emre Can që pavarësisht se te Juventus nuk mundi të jepte gjithçka kishte, te të verdhët e Bundesligës ka bërë një prezantim shumë të mirë.
Kjo ndeshje nuk do të jetë aspak e lehtë për djemtë e Lucien Favre, të cilët vihen përballë kryesuesve të padiskutueshëm të Francës. PSG-ja e trajnerit Thomas Tuchel, me në krye Mbappen dhe Icardin, pasi për Neymar nuk dihet nëse do jetë në gjendje të luajë pas dëmtimit të marrë së fundmi, duket e paprekshme. Një natë me dy supersfida dhe plot emocion pritet të jetë startimi i fazës së 1/16-ave të Champions League./Fjala.al/Katerina Tafa/
