Zëvendëskryeministri Erjon Braçe ka reaguar pas raportimeve se Policia e Shtetit ka ndaluar biznesmenin Henri Çili.
Ndonëse jo zyrtarisht, raportohet se Çili është ndaluar me kërkesë të Prokurorisë së Përmetit pasi është regjistruar në përgjime duke u përpjekur të ndryshojë vendimin për Arbion Aliko. Aliko është i dënuar përjetë për vrasjen e efektivit Ibrahim Basha në vitin 2014, gjatë aksionit të policisë në Lazarat.
Ndonëse nuk përmend emrin e Çilit, Braçe ka publikuar foton e efektivit Ibrahim Basha dhe thekson se gjaku i tij nuk do të bëhet kurrë para e pasuri për batakçinjtë.
Bashkë me pronarin e UET janë ndaluar edhe 8 persona të tjerë.
Reagimi i Braçes:
Ibrahim Basha
Shërbyes i shtetit dhe i ligjit!
Nuk do të harrojë kush ty! Nuk do të shesë kush ty! Ti do të jesh përherë dëshmor i atdheut!
Gjaku yt nuk do të bëhet kurrë para e pasuri për batakçinjtë!
Bravo Prokurorisë së Republikës e bravo Policisë së Shtetit!
I neveritur nga llumi që do drejtësinë për ta blerë e shitur, i neveritur nga llumi politik që ulëret kundër reformës në drejtësi, por blerësit e shitësit i ka në listë deputetësh, i neveritur nga llumi me firmë e vulë që noterizon blerjen e shitjen e drejtësisë.
