Ndonëse Organizata Botërore e Shëndetit shpalli pandeminë nga koronavirusi duket se UEFA është duke hezituar ende për shtyrjen e Euro 2020-ës.
Arsyeja e këtij hezitimi është fakti se pas aktiviteteve madhore qëndrojnë kontrata të majme me sponsorët, televizonet dhe botën e reklamave. Kampionati Europian është i dyti pas Kupës së Botës si aktiviteti më fitimprurës në rang përfaqësuesesh, ndaj edhe zyrat e Nionit nuk po japin një vendim për shtyrjen e këtyre ndeshjeve, ndonëse koronavirusi ka shënuar mijëra viktima dhe dhjetëra mijëra të prekur.
Më 17 mars do të vijë vendimi përfundimtar për shtyrjen apo jo të Euro2020 në verën e vitit të ardhshëm, për t’u dhënë kështu kohë ligave të mbyllin veprimtaritë e tyre, por nëse ndodh kjo, humbjet për UEFA-n do të jenë kolosale.
Shifrat shkojnë në 300 milionë euro dëme, që në Nion nuk duan t’i kenë mbi shpatulla, për këtë arsye sot pritet që UEFA të mblidhet me të 55 anëtarët e saj për të diskutuar rreth këtij problemi madhor dhe për të marrë një vendim./Fjala.al/
