Misioni për kthimin e shqiptarëve, Balluku tregon cilët shtetas do riatdhesohen

Ditën e sotme është nisur avioni i parë që do të sjellë shqiptarët e ngelur në Itali për shkak të mbylljes së kufijve nga koronavirusi.

Avioni i parë, “Lasgushi”, në bordin e të cilit ndodheshin një ekip prej 30 mjekësh dhe infermierësh shqiptarë, të cilët do të japin kontributin e tyre në përballimin e situatës në Itali, udhëtoi drejt Romës për t’u kthyer prej andej me qytetarët shqiptarë, të cilët do të riatdhesohen.

Ministrja e Infrastrukturës dhe Energjisë, Belinda Balluku, sqaroi se qytetarët, të cilët do të kthehen në Shqipëri do të jenë ata që janë përzgjedhur mbi bazën e kritereve të përcaktuara nga Ministria për Europën dhe Politikën e jashtme.

“Sot nisim fluturimet për misionin e shpëtimit të të gjithë shqiptarëve të cilët ndodhen në Europë dhe kanë nevojë të kthehen në shtëpitë e tyre. Duhet të kemi parasysh disa nga kriteret që ministria e Jashtme ka vendosur. Ata që mund të kthehen janë studentët, ato grupe në nevojë të cilët nuk kanë një strehë sot në qytetet europiane ku ndodhen, ose qytetarët të cilët jetojnë në Republikën e Shqipërisë. Për të gjithë qytetarët e tjerë, nënshtetasit shqiptarë, por që jetojnë, punojnë në vendet e tjera europiane duhet të vazhdojnë të qëndrojnë atje. Ne jemi në luftë, kjo nuk është një kohë për të bërë turizëm e për t’u kthyer pranë familjarëve, padyshim kur të kemi fituar këtë luftë të gjithë do ktheheni në atdheun tuaj për të takuar familjarët”,-tha Balluku.

Më tej ajo bëri të ditur se misionet për kthimin e shtetasve shqiptarë do të vijojë për disa ditë teksa he tdheksoi se janë marrë të gjitha masat për sigurinë e të gjithë stafit të “Air Albania” që do të angazhohen në këtë mision.

“Djemtë dhe vajzat e “Air Albania”, të pajisur dhe të veshur ashtu siç duhet pasi do jetë një mision i rrezikshëm, do të kryejë këtë fluturim për disa ditë me radhë, në të gjitha qytetet ku janë deklaruar se kemi qytetar shqiptarë në nevojë që duhet të kthehen në familjet e tyre. Djemtë dhe vajzat e “Air Albania”, pilotët, janë të angazhuar për ta kryer këtë mision sa më shpejtë dhe sa më mirë”, deklaroi ministrja Balluku./Fjala.al/