Pas shumë ditësh intensive në Spitalin Infektiv ku shihje ambulanca që sillnin njerëz të cilët dyshoheshin për Covid-19, duket se sot ka rënë një qetsi. Këtë mesditë Ministria e Shëndetësisë konfirmoi 6 raste të reja, një shifër kjo e ulët nga ditët e mëparshme.
Në gardhin rrethues të Spitalit infektiv që tregon ndalimin e personave jo të autorizuar, është varur një banderolë e re. Në një çarçafë të bardhë janë varur disa mesazhe falenderuese ndaj stafit mjekësor.
‘“Të falenderoj nga zemra që shërove gjyshin tim…”, thuhet në një nga mesazhet e vendosura në banderolë.
Në 24 orët e fundit janë testuar 182 persona të dyshuar, prej të cilëve janë konfirmuar 6 raste të reja me COVID-19. Deri në këto momente janë testuar 2753 raste të dyshuara dhe prej tyre janë të konfirmuar pozitivë me COVID-19, 383 raste. Betejën me këtë sëmundje e kanë humbur deri tani 22 qytetarë, megjithë përpjekjet e jashtëzakonshme të personelit shëndetësor.
