Më 27 Mars, Qendra Euroatlantike e Koordinimit të Përgjigjes ndaj Fatkeqësive e NATO (EADRCC) ka marrë një kërkesë për ndihmë ndërkombëtare nga Qeveria e Shqipërisë për situatën e krijuar nga pandemia globale e koronavirusit COVID-19. Në kërkesë është paraqitur një listë me paisje mjekësore duke filluar nga maskat deri tek ventilator.
“Me qëllim të parandalimit të përhapjes së virusit në stafin shëndetësor, stafit në vijën e parë dhe qytetarëve, iu kërkojmë partnerëve tanë ndërkombëtarë t’i japin ndihmë Ministrisë së Shëndetësisë dhe Mbrojtjes Sociale në përgjigjen ndaj pandemisë globale”, thuhet në dokumentin e siguruar nga BalkanWeb.
Në dokumentin dërguar EADRCC shkruhet se Shqipëria ka përshtatur 2 spitale me 480 shtretër për trajtimin e të infektuarve nga Covid-19. Në dokumentin e dërguar më 27 mars shkruhet gjithashtu se pritet rritja e rasteve me Covid-19 në javët në vijim.
Kjo kërkesë është ende duke u shqyrtuar dhe nuk dihet nëse do të ketë një përgjigje pozitive për shtetin shqiptar.
Lista e pajisjeve të kërkuara per bluzat e bardha dhe spitalet përfshin:
2 mijë kaska mbrojtëse CPAP
2 mije kaska mbrojtëse NIV
200 njësi monitorimi kontrolli
1 mijë Matës të rrjedhës së oksigjenit
300 mijë Doreza nitrile 230 mm
200 mijë veshje mbrojtëse për mjekët
1 milion maska kirurgjikale
500 mijë maska FFP3
500 monitorë me shumë parametra
500 pompa shiringe
300 ventilatorë për kujdes intensiv (me kompresorë ajri)
500 ventilatorë për kujdes nën-intensiv (me baze turbine)
500 shtretër me dyshekë
500 pajisje për shtretërit
500 dollapë për veshjet
Më herët edhe vende te tjera anetare te NATO-s kanë kërkuar ndihmën e aleances për të përballuar pandeminë.
